DILI, 11 marsu 2022 (TATOLI)—Bee Timor-Leste, Empreza Públika (BTL, E.P) sesta ne’e, simu ekipamentu bee-moos hosi Ajénsia Kooperasaun Internasionál Japaun (JICA, sigla inglés) atu hadi’a sistema bee-moos ne’ebé hetan estragu tanba dezastre naturál.
“Ohin ita iha seremónia entrega (handover) ekipamentu bee hosi ita-nia parseiru JICA, liuhosi projetu apoiu atu kombate COVID-19 iha Timor-Leste, nune’e bele reforsa ka mantein preparasaun no manutensaun sistema bee-moos ne’ebé durante ne’e hetan estragu tanba inundasaun ne’ebé akontese iha loron 04 abríl 2021,” Prezidente Konsellu Administrasaun BTL, E.P, Carlos Peloi dos Reis, hateten, iha salaun BTL, E.P, Pateo.
Notísia relevante: 2022: BTL, E.P sei implementa konstrusaun fíziku mellora bee-moos
Nune’e, ekipamentu ne’ebé ohin JICA entrega mak hanesan besi lolon boot ho medida DN 300 mili metru hamutuk 124 no no besi kanu medida kiik DN 15 mili metru hamutu 2.226, inklui ai-moruk kímiku ba tratamentu bee-moos.
“JICA halo esforsu atu apoiu tan sistema fornesimentu bee ho medida oioin, ne’ebé prosesu daudaun iha dalan ona. Espera tempu badak bele to’o mai no bele reforsa tan serbisu BTL, E.P ein termu asegura bee ba komunidade. Ekipamentu sira ne’e ita uza atu hadi’a sistema sira ne’ebé mak durante ne’e falla,” nia akresenta.
Iha fatin hanesan, Xefe Reprezentante JICA iha Timor-Leste, Goto Ko, hateten, inisiativa ne’e tanba antes ne’e parte rua halo ona parseria di’ak hodi hadi’a sistema bee-moos.
“Ami apresia ho BTL, E.P nia serbisu kooperasaun, nune’e ohin fó apoiu ekipamentu sira tanba haree instituisaun Estadu ne’e foin estabelese iha tinan kotuk,” nia dehan.
Tuir Reprezentante JICA ne’e, apoiu ne’e la to’o de’it iha ne’e, maibé sei halo esforsu hadi’a infraestutura sira ne’ebé hetan estragu.
Jornalista : Arminda Fonseca
Editora : Julia Chatarina
