VIQUEQUE, 11 marsu 2022 (TATOLI)–Kandidatu Prezidente Repúblika (PR) ba períodu 2022-2027, hosi partidu Frente Revolucionária do Timor-Leste Independente (FRETILIN), ho númeru sorteiu 06, Francisco Guterres ‘Lú Olo’, kompromente, bainihira povu nafatin fó fiar ba nia atu reeletu, mak sei harii ekonomia sustentável ba povu.
“Povu tomak mai hamutuk ho ha’u, karik ha’u eleitu sai Prezidente Repúblika, sei harii ekonomia ida sustentável hodi povu bele moris di’ak, hamutuk ho ha’u hodi lori juventude ida-ne’e hakmatek iha sira-nia rain rasik,” Lú Olo hateten iha kampaña iha kampu futeból, Viqueque villa, sesta ne’e.
Notísia relevante: Lu Olo sei halakon korrupsaun no dignifika estatuta RAEOA
Aleinde ne’e, haree ba Timor-Leste nia fonte únika mak fundu minarai, tanba ne’e Lú Olo sei kolabora ho Governu atu kuida fundu ne’e hodi sustenta povu nia moris di’ak.
“Ita bele hasai osan fundu minarai maibé tenki gasta ho kuidadu, bainhira hasai tenki lori fundu minarai hodi halo orsamentu. Maibé osan ne’ebé sai tenki kuda iha ita-nia rain, atu haburas ita-nia ekonomia rai-laran,” Kandidatu PR ne’e akresenta.
Bainhira reeleitu, nia mós hakarak kolabora ho parte Governu hodi uza orsamentu hadi’a kondisaun iha parte saúde no agrikultura hodi hasa’e produsaun, atu povu bele hetan moris di’ak.
“Ha’u prontu hadi’a polítika seguransa, hanesan Polísia Nasionál Timor Leste (PNTL) no FALINTIL-Forsa Defeza Timor Leste (F-FDTL), nune’e forsa rua ne’e bele serbisu hamutuk hodi fó seguransa ba povu,” nia tenik.
Lú Olo hakarak garante liberdade sidadaun no proteje sidadaun sira-nia diretu, atu fó kbiit ba Na’i-ulun sira ukun tuir lei haruka.
“Ha’u sei asegura diretu demokrátiku Estadu ne’ebé la’o ho lei no sei la la’o tuir Prezidente nia vontade ka ema seluk nia vontade, tanba lei maka hun no abut ba ita-nia nasaun. Ha’u sai Prezidente sei respeita Konstituisaun,” Kandidatu PR hosi Partidu FRETILIN dehan.
Lú Olo komprometidu atu kombate korrupsaun iha Timor-Leste tanba konsidera kestaun ne’e sai hanesan moras a’at iha nasaun.
Entretantu, atividade kampaña ne’e hahú tuku 14:00 to’o tuku 16:30, ne’ebé hetan seguransa hosi Polísia Nasionál Timor Leste (PNTL) no observa direta hosi observadór internasionál hosi Uniaun Europeia (EU) no Komisaun Nasionál Eleisaun (CNE, sigla portugés).
Eleisaun Prezidensiál 2017
Iha Eleisaun Prezidensiál tinan 2017, iha kandidatu hamutuk ualu mak kompete hanesan António da Conceição ‘Kalohan’, Maria Ángela Freitas da Silva, António Maher Lopes ‘Fatuk Mutin’, Amorin Viera, José António de Jesus Neves ‘Samala Rua’, Francisco Guterre ‘Lú Olo’, Luís Alves Tilman, José Luís Guterres ‘Lugu’.
Dadus eleitór ne’ebé rejistu iha tempu ne’ebá hamutuk 743.150, ne’ebé hosi rezutadu Eleisaun Prezidensiál tinan 2017, Kandidatu PR ba períodu 2017-2022, Francisco Guterres ‘Lú Olo’ hetan votu hosi munisípiu Viqueque hamutuk 32.054 no votu totál iha territóriu tomak hamutuk 295.048, ne’ebé korresponde ho 57,1%,
Nune’e, Lú Olo manán iha primeira ronda no ikus mai eleitu sai Prezidente Repúblika ba períodu 2017-2022 no simu pose iha loron 20 maiu 2017.
Jornalista : Vitorino Lopes da Costa
Editora : Julia Chatarina
