DILI, 11 marsu 2022 (TATOLI)–Sekretaria Estadu Kooperativa (SEKoop) hamutuk ho Plan Internasionál Timor-Leste, asina nota entendimentu atu fó apoiu ba grupu kooperativa ne’ebé durante ne’e estabelese ona iha munisípiu Ainaro no Aileu.
Plataforma ne’e asina hosi Diretór Jerál Kooperativa SEKoop, Francisco Xavier no Diretór Nasionál Plan Internasionál, Dillyana Ximenes.
“Objetivu nota entendimentu ne’e, atu parte SEKoop bele fasilita formasaun kona-ba lala’ok kooperativa ba grupu hirak ne’ebé durante ne’e Plan Internasionál estabelese ona iha munisípiu Aileu hamutuk grupu neen no munisípiu Ainaro hamutuk grupu haat, ne’ebé prontu ona atu nakfilak-an sai kooperativa kréditu,” Diretór Jerál Kooperativa SEKoop, Francisco Xavier, hateten, liuhosi nota ne’ebé Agência TATOLI asesu, sesta ne’e.
Notísia relevante: SEKoop konsidera kréditu uniaun sai espíritu ba dezenvolvimentu kooperativa
Nune’e, Diretór Jerál Kooperativa apresia ho prezensa parseiru, ne’ebé ho vontade di’ak fó apoiu ba komunidade iha área rurál hodi tama ba vida kooperativa.
“Kooperasaun ida-ne’e importante tebes hodi atende ba situasaun komunidade. Ita hotu hatene Governu mesak sei labele kobre komunidade nia preokupasaun hotu, maibé prezensa parseiru sira hanesan Plan Internasionál bele responde mós parte balun,” nia akresenta.
Ho inisiativa ne’e, nia otimista bele benefisia parte hotu, tanba antes ne’e parte SEKoop asina ona akordu ho parseiru sira hanesan, Corpu da Paz, World Vision, Adventist Development and Relief Agency (ADRA), Programa Nasaun Unida ba Dezenvolvimentu (UNDP, sigla inglés) no parseiru seluk tan.
Iha biban hanesan, Diretora Nasionál Plan Internasionál, Dillyana Ximenes, kontente bele serbisu hamutuk ho SEKoop, nune’e bele haforsa liután grupu hirak ne’ebé estabelese ona iha tinan barak nia-laran.
“Ha’u husu ba parte rua atu labele viola akordu ne’ebé ita konkorda ona, maibé hotu tenke kumpre regra sira ne’e, hodi nune’e ba futuru labele akontese buat hirak ne’ebé ita hotu la espera,” nia dehan.
Jornalista : Arminda Fonseca
Editora : Julia Chatarina
