BAUCAU, 12 marsu 2022 (TATOLI)—Kuadru másimu Os Verdes liuhosi kompromisu polítiku durante kampaña Kandidatu Prezidente Repúblika (PR) períodu 2022-2027 hosi partidu Frente Revolucionária do Timor-Leste Independente (FRETILIN), Francisco Guterres ‘Lú Olo, sábadu ne’e, iha Baucau, garante militante sira sei fó apoiu.
“Ami sei lori membru tomak hamutuk 50.000 resin atu fó votu ba Aman Lú Olo,” Prezidente Os Verdes, Lela Huno, deklara durante kampaña iha Darsula, suku Gariuai.
Tuir Lela Huno, kompromisu ne’e hatudu ona hahú bainhira realiza kampaña Kandidatu PR Lú Olo iha Oé-cusse, Emera, Liquiçá Bobonaro no ohin iha Baucau, militante sira nafatin marka prezensa.
Notísia relevante: Os Verdes no militante partidu rua iha Viqueque fó apoiu ba Lú Olo
Maski durante kampaña, hatudu nakonu ho koris mean, Lela Huno otimista iha loron atividade ikus iha Dili, sei domina ho militante Os Verdes.
“Ohin mean halo mean tomak iha rai Baucau, ha’u hein loron 16 marsu, matak sei halo matak iha Dili,” Prezidente Os Verdes arguementa.
Antes ne’e, liuhosi sorumutu ho Sekretáriu Jerál partidu FRETILIN, Marí Alkatiri, Os Verdes deside fó apoia ba Kandidatu PR Lú Olo, tanba fiar katak bainhira reeleitu, sei sai aman no símbolu unidade nasionál.
“Partidu Os Verdes hamutuk ho FRETILIN sei halo Timor-Leste sai buras, matak no malirin,” nia afirma.
Aleinde apoiu Os Verdes, durante kampaña iha Baucau, hetan apoiu mós hosi militante hosi Partidu Libertasaun Popular (PLP) inklui Partidu Unidade Dezenvolvementu Demokrátiku (PUDD).
Jornalista : Natalino Belo
Editora : Julia Chatarina
