iklan

EDUKASAUN, HEADLINE

DNASE apoiu tan materiál emerjénsia hadi’a eskola sia

DNASE apoiu tan materiál emerjénsia hadi’a eskola sia

Kondisaun ikus atividade apredijazen estudante Eskola EBF Aiasa, Balibo ne'ebe anin sobu, foin lalais ne'e. Imajen/Antonio Goncalves

DILI, 14 marsu 2022 (TATOLI)–Ministériu Edukasaun Juventude no Desportu (MEJD), liuhosi Diresaun Nasionál Asaun Sosiál Eskolár (DNASE), tinan ne’e fó tan apoiu materiál emerjénsia ba eskola sia ne’ebé afetadu ba dezastre naturál.

Tuir Diretór Nasionál Asaun Sosiál Eskolár, Joaquim Martins, totál eskola ne’ebé afetadu ba dezastre naturál hosi tinan 2020 to’o 2022 ne’e iha eskola 68, maibé konsege apoiu ona eskola 36.

“Eskola 23 seidauk hetan apoiu tanba presiza halo uluk verifikasaun hodi hatene ninia gravidade, atu nune’e ita bele halo estimasaun atu hatene eskola sira ne’ebé presiza materiál emerjénsia,” Diretór Joaquim informa hafoin ramata seremónia entrega materiál emerjénsia, iha edifísiu MEJD, Vila verde, segunda ne’e.

Notísia relevante: Plan International apoiu materiál emerjénsia hadi’a infraestrutura eskola

Apoiu materiál emerjénsia ba eskola sira la tama programa Mão de Obra, tanba ne’e ezije kontribuisaun komunidade no inan-aman hosi estudante, atu apoiu malu hodi bele aselera prosesu reabilitasaun eskola.

“Tanba eskola sira ne’e, ninia kondisaun barak liu hetan estraga iha parte kakuluk, ne’ebé presiza hetan kooperasaun di’ak entre ministériu, eskola ho inan-aman no komunidade atu alkansa prosesu ne’e lori filafali labarik sira iha prosesu ensinu aprendizajen ida seguru,” Diretór akresenta.

Ho nune’e, eskola sia ne’ebé daudaun ne’e hetan ona apoiu materiál emerjénsia, DNASE uza orsamentu tinan kotuk nian ho montante $46.000 resin, maibé orsamentu ne’e sei iha hela aprovizionamentu, tanba ne’e sei asegura hela tanba dadus eskola ne’ebé iha ona kuaze 32.

“Tanba ne’e, maka ita-nia serbisu prevee hela materiál sira, nune’e bainhira mosu dezastre naturál tuir mai, ita bele lalais fó apoiu imediata kedan, tanba apoiu ne’ebé maka Plan International fó ne’e la sufisiente tanba ne’e ita tenta husu tan apoiu ba parseiru sira seluk,” nia tenik.

Eskola sia ne’ebé hetan ona apoiu materiál emerjénsia ne’e iha munisípiu tolu hanesan Bobonaro Eskola Ensinu Sekundáriu Jerál (ESJ) Katólika São Miguel Arcanjo Hauba, Eskola Ensinu Sekundáriu Filiál (EBF) Haulba, EBF Gelokat, Eskola Ensinu Báziku Sentrál (EBC, sigla portugés) Atu-aben no Ensinu Pre Eskolár (EPE) Teba-Bui, munisípiu Baucau EBF Bucoli, munisípiu Ermera EBF Humboe no EBF Hatu-Gau.

Enkuantu, totál eskola 23 ne’ebé maka afetadu ba dezastre naturál ne’ebé akontese iha munisípiu ualu mak hanesan munisípiu Ainaro EBF Ta-tiri no EBF Luan-kado’ik no EBF Maulo, hosi munisípiu Baucau EBF Bruka, EBF Wai-Kolo no EBF Dai-mena, munisípiu Bobonaro EBF Holsa, EBF Felokat, EBC Atu-aben no Ensinu Sekundáriu Tékniku Vokasionál Lamato.

Nune’e mós, munisípiu Ermera EBF Hatu-Gau, EBF Humboe, EBF Asui-Lokau, no EBF Leo-budu, munisípiu Lautém EBF Kailiu, EBF Lai-kara no EBF Ai-larima, munisípiu Liquiçá EBF Gariana, EBF Tibar, EPE Tibar, enkuantu munisípiu Manatuto EBF Fatu-Lau, Eskola ESJ Dom Basílio Laklubar, munisípiu Manufahi EBF Fatukalu, EPE Aikmua, EPE Bubu-Lau, EPE Ai-Tuha, EPE Rai-madia.

Jornalista : Tomé Amado

Editora     : Julia Chatarina

iklan
iklan

Leave a Reply

iklan
error: Content is protected !!