DILI, 14 marsu 2022 (TATOLI)–Kandidatu Prezidente Repúblika (PR) períodu 2022-2027 hosi partidu Frente Revolucionária do Timor-Leste Independente (FRETILIN), ho númeru sorteiu 06, Francisco Guterres ‘Lú Olo’, deklara sei hametin Estadu direitu demokrátiku, bainhira hetan fiar hosi povu hodi reeleitu.
“Karik eleitu sai Prezidente Repúblika, ha’u sei ukun rai ida-ne’e no povu, tuir de’it lei ho Konstituisaun, signifika ha’u sei hametin Estadu direitu demokrátiku, Estadu ne’ebé povu tomak ho vontade harii hafoin funu naruk tinan 24, ema barak mate, terus, no ita-nia-oan, inan-aman lakon,” Kandidatu PR Lú Olo, hato’o deklarasaun polítika durante kampaña aberta, iha kampu Futeból Dom Bosco, Comoro, segunda ne’e.
Notísia relevante: Reeleitu sai PR, Lú Olo hakarak harii ekonomia sustentável ba povu
Atuál Prezidente Repúblika ne’e dehan, povu ho vontade tomak luta to’o manán hodi hetan independénsia, ne’ebé la’ós oferta hosi ema seluk lori mai entrega ba povu liman, maibé povu nia obra rasik liuhosi sakrifísiu, terus, mataween maka foin harii Estadu.
“Tanba ho povu maka ikus mai harii Estadu ida-ne’e ho lei no Konstituisaun ida, Estadu hambrik ho lei hodi afirma ukun rasik-an ba ita-nia povu,” nia afirma.
Tanba ne’e, tuir Kandidatu PR ne’e, Estadu hambrik ho lei atubele afirma ba mundu katak Timor-Leste iha povu no rai soberanu, atu nune’e ema hotu bele respeita.
“Maibé Estadu direitu demokrátiku la natón de’it ba ida, presiza harii Estadu atubele garante sidadaun hotu nia diretu no Liberdade, signifika kestaun ne’e presiza hatene forma organizasaun Estadu hodi bele halo ezersísiu poder polítiku Estadu, atubele garante direitu no liberdade sidadaun hotu nian,” Lú Olo akresenta.
Tanba ne’e, Kandidatu hosi partidu FRETILIN ne’e konsidera, sistema semi prezensialista hodi órgaun soberanu sira fahe knaar ba malu, maibé molok atu haknaar-an, tenki liuhosi lejitimilidade ida, ne’ebé votu povu nian no laiha órgaun ida hambrik mesak hodi lori nia vontade hodi ukun rai no povu ne’e.
Iha biban hanesan, Apoiante Kandidatu PR, Arnaldo Ximenes Soares, konsidera Lú Olo hanesan líder ne’ebé hadomi povu, liuliu iha situasaun pandemia COVID-19.
“Durante Lú Olo sai Prezidente Repúblika, povu ida-ne’e hakmatek tebes. Tanba ne’e maka ami nafatin hili nia tanba nia responsabilidade boot tebes ba povu, katak nia hadomi duni nia povu no kuidadu hodi labele mate barak durante COVID-19. Ha’u haree Lú Olo mós ema rezisténsia ida durante luta iha ai-laran hamutuk ho líder sira seluk,” Arnaldo Ximenes fó sasin.
Maski nune’e, apoiante ne’e iha espetativa ba kandidatu PR ne’e, karik reeleitu, presiza nafatin tau prioridade ba povu.
Durante kampaña hetan supervizaun hosi Komisaun Nasionál Eleisaun (CNE, sigla portugés), observadór Uniaun Europeia, Provedoria Direitu Umanu no Justisa (PDHJ, sigla portugés), no hetan seguransa másima hosi Polísia Nasionál Timor-Leste (PNTL).
Jornalista : Antónia Gusmão
Editora : Julia Chatarina
