DILI, 15 marsu 2022 (TATOLI)–Chairman do Dili Company Lda. (Timor Plaza), Jape Kong Su, akompaña hosi Vise-Chairman, Alan Jape no Managing Diretor, Tony Jape, tersa ne’e, hasoru malu ho Primeiru-Ministru (PM), Taur Matan Ruak, hodi ko’alia kona-ba dezenvolvimentu rai-laran, ne’ebé iha biban ne’e ekipa reafirma komprimisu dezenvolve Timor-Leste.
“Hafoin tinan rua, avo sente kontente bele visita Primeiru-Ministru no hetan informasaun barak tebes hosi Primeiru-Ministru kona-ba dezenvovimentu nasaun no avo Jape nafatin tau importánsia ba nasaun ida-ne’e hodi kontinua dezenvolvimentu,” Alan Jape hateten hafoin hasoru malu ho Xefe Governu, iha Rezidénsia Farol.
Notísia relevante: Jape Group Sei Harii Tan CBD Andar 16
Biban ne’e, ekipa ne’e relata mós planu konstrusaun Timor Plaza, hanaran CBD 10 ne’ebé daudaun iha hela prosesu konstrusaun inklui dezenvolvimentu iha área turizmu.
“Timor-Leste iha relasaun di’ak ho Austrália, nune’e hatudu kolaborasaun iha aviaun Qantas ne’ebé kontinua semo mai Timór ho permanente ona, sai hanesan informasaun ne’ebé di’ak mai ami, atu nune’e bele investe osan no esforsu iha área turizmu,” nia subliña.
Jornalista : Antónia Gusmão
Editora : Julia Chatarina
