DILI, 15 marsu 2022 (TATOLI) – Kandidatu Prezidente Repúblika períodu 2022-2027 ho númeru sorteiu 16, Mariano Assanami Sabino Lopes, kansela nia vizita bá prezu sira iha Becora, tanba kumpre regra Governu nian.
“Ami la konsege bá vizita, tanba iha regra ne’ebé mak ita presiza kumpre. Sira [Ministériu Justisa] iha regra internál ne’ebé iha momentu kamapaña nian ita labele vizita”, afirma Mariano Assanami, ba Tatoli, iha sede Colmera, Dili.
Nune’e, kandidatu refere fó hakuak boot ba rekluzu sira hotu iha Becora no Gleno.
“Ami fó mós hakuak no hakruuk ba maluk sira ne’ebé moras iha ospitál tanba regra sira ne’ebé iha. Ami tenki kumpre, maibé ami sempre hein katak ita hothotu nia votu maka halo mudansa ba ita-nian rai”, nia hateten.
Tuir Assanami, joven barak mak tama iha komarka, tanba falta postu traballu no stressa, nune’e hamosu problema barak.
“Ha’u-nian polítika, ha’u hakarak hamate liafuan ida dehan joven bandidu, joven kriminozu, joven ne’ebé mak laiha postu serbisu. Ha’u hakarak hadi’ak no muda ida ne’e. Ne’e labele prega tan ba joven sira. Tanba ne’e, ha’u iha inisitiva atu vizita bá kadeia rua, más tanba regra, ha’u la bá”, esplika.
Prezidente Partidu Demokrátiku ne’e akresenta katak nia kandidatura ne’e mai atu rezolve ona problema joven nian.
Vizita kandidatu bá Prizaun Becora ne’ebé kanseladu ne’e entre tuku 08h00 to’o 18h00.
Jornalista: Isaura Lemos de Deus
Editora: Maria Auxiliadora
