DILI, 15 marsu 2022 (TATOLI)–Country Director Plan International, Dilyana Ximenes, hakarak aselera prosesu akordu kooperasaun ho Ministériu Edukasaun Juventude no Desportu (MEJD), tanba nota katak prosesu ne’e atraza tebes.
“Prosesu atu asina akordu ne’e tarde loos, maibé ha’u ko’alia ona ho diretór sira atu aselera prosesu ne’e. Tanba durante ne’e Plan International sempre iha ministériu nia sorin, maibé tanba saida maka prosesu ne’e tarde loos,” Reprezentante Plan International hateten iha edifísiu MEJD, Vila verde, tersa ne’e.
Notísia relevante: Plan International apoiu materiál emerjénsia hadi’a infraestrutura eskola
Tuir Dilyana Ximenes, tenke iha esforsu hodi bele selebra ona akordu, tanba difisil atu fó apoiu fundu tanba laiha akordu, tanba ne’e nia husu MEJD atu haree kestaun ne’e.
“Bainhira ita iha ona akordu formál, fasil loos mai ami atu aloka fundu bainhira iha ezijénsia ruma, maibé kuandu akordu seidauk iha dalaruma susar oituan tanba tenke halo fali justifikasaun oin-oin,” nia tenik.
Iha biban hanesan, Diretór Jerál Planu Polítika no Inkluzaun, Raimundo Jose Neto, dehan, prosesu proposta hosi Plan International hanesan kontinuasaun, ne’ebé MEJD realiza ona diskusaun hamutuk no rezultadu hosi diskusaun ne’e konsege prodús ona esbosu.
“Rezultadu ita hotu haree ona no tempu besik sei aprezenta ba Ministru hodi haree fali aspetu jurídiku balun atu ikus mai labele fó todan ba malu,” nia akresenta.
Bainhira iha paresér téknika balun tuir aspetu jurídiku mak foin prenxe rekezitu, agora hein de’it Ministru Edukasaun Juventude no Desportu, Armindo Maia aprova hodi bele aselera prosesu asina akordu.
Jornalista : Tomé Amado
Editora : Julia Chatarina
