COVALIMA, 15 marsu 2022, (TATOLI)—Servisu Munisípiu Agrikultura Covalima (SMAC) sei reabilita irrigasaun Bebu hodi distribui bee ba natar ektare 190 iha postu Administrativu Zumalai munisípiu Covalima.
“Iha tinan ne’e orsamentu aprovadu ona, atu halo konstrusaun irrigasaun foun iha postu administrativu Zumalai irrigasaun Bebu, ami hatene no aprovadu ona, iha tempu badak liuhosi konkursu iha nivel munisípiu bele konkretiza planu iha tinan ne’e, tanba irrigasaun Bebu lokaliza iha suku Fatuleto no Zulo,” Diretór Servisu Agrikultura Covalima, Domingos Gumão, informa ba Agência Tatoli, iha nia knar fatin Tabakolot, tersa ne’e.
Atu reabilita irrigasaun ne’e, uza Orsamentu Jerál Estadu 2022 ho montante $98,406 ne’ebé iha tempu badak halo ona konstrusaun ba irrigasaun Bebu ne’ebé lokaliza iha postu administrativu Zumalai.
Irrigasaun Bebu ho nia naruk metru 1,200 ne’ebé família 190 mak sei sai benefisiariu ba irrigasaun ne’e, ho luan área atu kuda hare iha natar 190 no daudaun ne’e agrikultura sira halai hela natar, tanba ne’e mak atu kanaliza bee ba natar ne’e sira uza manuál nune’e presiza halo konstrusaun ho permanente.
“Foin lalais ami ho tékniku sira halo peskiza, tanba problema sosiál komunidade suku rua maibé autoridade lokál rezolve ona teknikamente servisu munisipál agrikultura preparadu hodi fó asisténsia ba agrikultura sira hodi konklui irrigasuan ramata bele fornese bee ba natar,” nia esplika.
Atu halo konstrusaun ba irrigasaun ne’ebé orsamentu OJE 2022 aprova ona maibé atu loke tenderizaun, ida-ne’e kompeténsia hosi Servisu Munisipál Obra Públika Covalima, servisu munisipál agrikultura hein de’it kompañia ne’ebé manán konkursu hodi konstrui irrigasaun ba agrikultura sira.
Dadus hosi Servisu Agrikultura Covalima presiza reabilita irrigasaun 14 ne’ebé sei reabilita ho fazeadamente, tanba iha munisípiu Covalima liu-liu iha postu administrativu Zumalai ho Suai vila mak poténsia ba natar.
Jornalista : Celestina Teles
Editor : Cancio Ximenes
