VIQUEQUE, 15 marsu 2022 (TATOLI)–Diretór Servisu Sekretariadu Téniku Administrasaun Eleitorál (STAE), Humberto da Costa, hateten, munisípiu Viqueque laiha sentru votasaun móvel ba eleitór sira iha Eleisaun Prezidensiál ba períodu 2022-2027.
“Ita laiha votasaun ambulante, tanba ami rasik la simu lista rejistasaun ba votasaun móvel,” Diretór STAE hateten ba Agência TATOLI, iha salaun munisipál, tersa ne’e.
Aleinde ne’e, parte saúde iha munisípiu Viqueque la informa lista ba STAE, tanba ne’e la estabelese.
“Doutór sira iha hospitál internamentu informa ba ami katak ema baixa ne’e to’o loron-tolu alta ona no halo ona rujukan ba Hospitál Referál Baucau,” nia akresenta.
Notísia relevante: CNE-STAE loke pakote materiál Eleisaun Prezidensiál perante reprezentante Kandidatu PR
Tuir lei, molok tama loron 10 ba votasaun, parte saúde munisípiu Viqueque tenke submete ona lista ba STAE, maibé to’o agora la simu.
Munisípiu Viqueque laiha mudasaun ruma, sentru votasaun hamutuk 92 no estasaun votasaun 110.
Númeru eleitór munisípiu Viqueque ne’ebé atu partisipasaun Eleisaun Prezidensiál tinan ne’e hamutuk 58.421, kompostu hosi feto na’in-28.746 no mane na’in-29.675
Jornalista : Vitorino Lopes da Costa
Editora : Julia Chatarina
