DILI, 16 marsu 2022 (TATOLI)—Pontu Fokál Unidade Implementasaun Akademia (UIA) iha Sekretária Estadu Arte no Kultura (SEAK), Grigoriana das Dores Tilman, informa iha tetu fiskál Orsamentu Jerál Estadu (OJE) 2022, UIA tau importánsia ba programa prioridade rua.
Notísia Relebante: SEAK atu integra “Akademia Arte Kreativa Indústria Kulturál” ba UNTL
“Ami˗nia programa prioridade iha 2022 hamutuk rua mak rograma formasaun kona˗ba espesialidade tolu hanesan dansa, arte vizuál no múzika, ne’ebé sei fó ba estudante Pré˗sekundária iha munisipiu tolu hanesan RAEOA, Ermera no Aileu. Enkuantu, ba programa daruak mak konkursu ba dansa,” Grigoriana das Dores Tilman, informa ba Ajénsia Tatoli iha nia knaar˗fatin, Avenida Portugal, Dili, kuarta ne’e.
Pontu Fokal UIA ne’e esplika, iha konkursu dansa ne’e ekipa UIA sei ba fó iha baze kona˗ba konesimentu lala’ok dansa, hanesan dansa kontemporania, dansa foklor no dansa kulturál tradisonál.
“Iha konkursu ne’e ami sei halo iha Dili no loke ba públiku, ne’ebé ba maluk sira-ne’ebé interese ba konkursu ne’e bele mai rejistu,” nia dehan.
Objetivu hosi programa rua ne’e mak atu hasa’e sira˗nia kapasidade no konesimentu, liuhosi mundu artistiku nian, tanba agora Timor˗Leste moris ona iha mundu globalizasaun no mundu modernu.
“Ita realiza programa rua ne’e atu sira mós bele koñese iha mundu artistiku ne’e oinsá, dansa modernu no dansa kontemporania ne’e oinsá, ida ne’e mak ami sei fó ba sira,” nia hateten.
Bainhira mak realiza konkursu ne’e, nia informa, UIA seidauk termina loron bainhira mak atu realiza konkursu ne’e, tanba atividade konkursu ne’e ba kuatru trimestre ne’ebé monu iha fim do ano, enkuantu kona˗bá formasaun sei realiza iha semana oin.
“Entaun, atividade konkursu ne’e ami tau planu iha fin do ano ba fulan-novembru no dezembru, hanesan ami hala’o formasaun iha munisipiu sira-ne’e hotu mak ami foin realiza konkursu ne’e,” nia hateten.
Kritériu ba konkursu ne’e mak, ema idade 14 to’o 30 no nia tenke ema timor-oan. Entretantu, totál orsamentu ba realizasaun programa rua ne’e hamutuk $9,801.00.
Jornalista : Nelia Fernandes
Editór : Cancio Ximenes
