DILI, 17 marsu 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova rezolusaun ida hodi estabelese akordu ho nasaun Tailándia no Kambodia.
“Aprova Projetu Proposta Rezolusaun rua hodi lori ba Parlamentu Nasionál, ne’ebé aprezenta hosi Vise-Ministru Negósiu Estranjeiru no Kooperasaun ba aprovasaun akordu sira entre Repúblika Demokrátika Timor-Leste, Reinu Kambódia no Tailándia ba inzesaun vistu ba titulár sira-nia pasaporte diplomátiku no servisu nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun Konsellu Ministru, iha Palásiu Governu.
Notísia relevante: Timor-oan iha diaspora hetan toleránsia bainhira vistu inválidu
Rezolusaun ne’e mai ho objetivu hodi nasaun rua fó inzensaun vistu ba hirak ne’ebé tama nasaun ne’e no ofisiál hirak ne’ebé lori pasaporte diplomátiku no servisu.
“Iha akordu uluk ne’ebé Timor-Leste asina ho rai rua ne’e, dehan katak sidadaun Timor-Leste ne’ebé mak lori pasaporte diplomátiku no servisu, bainhira bá Tailándia no Kambodia bele livre vistu, nune’e mós sira-nia funsionáriu ka diplomata mai Timór mós sei livre hosi vistu,” Fidelis esplika.
Jornalista : Antónia Gusmão
Editora : Julia Chatarina
