DILI, 19 Juñu 2026 (TATOLI)—Repúblika Xeka no Áfrika Súl nia mehi atu kualifika ba Kopa Mundiál 2026 iha ronda 32 mihis, basá iha jogu daruak empata 1-1 iha Grupu A no jogu ba nasaun rua realiza iha Estádiu Atlanta, Sesta (19 Juñu 2026) madrugada.
Johgu daruak iha faze Grupu ne’e, lidera husi árbitru Norte-Amerikanu, Tori Penso, ne’e hahú la’o hahú kedas ho avansadu xeku, Patrik Schick besik atu loke golu ho ulun ne’ebé maka’as maibé la konsege.
Ekipa rua lansa kontra-atake ba malu tuir ritmu jogu nasaun ida-idak nian, Xeka halo presaun maka’as oinsa atu manán jogu basá iha jogu dahuluk kontra Korea Súl la konsege manán, enkuantu Áfrika Súl mós hala’o jogu ho intensaun atu gaña pontu tolu tanba iha sira-nia jogu dahuluk kontra Mexiko la konsege manán.
Ironia mak jogadór Patrick Schick husi Xeka ho nia kolega sira lidera ona dezde inísiu jogu nian. Maibé, penalti ida-ne’ebé tarde estraga vantajen xeku sira-nian, hodi husik sira ho luta ida ne’ebé maka’as liután hodi avansa ba Jornada 32.
Xeka sira-nia atake inisiál ikus mai fó rezultadu iha minutu neen (6). Hahú husi pasajen perfeitu husi Alexandr Sojka, jogadór Michal Sadilek, livre iha kaixa penalidade, ho matenek lansa suta badak ida ba poste loos husi baliza súl-afrikanu nian. Eskoru 1-0 ba Repúblika Xeka.
Ho golu ida, Áfrika Súl koko atu luta hasoru sira nia forsa atakante, Thapelo Maseko no Teboho Mokoena. Maibé, remata ne’ebé ladún di’ak no defeza xeka ne’ebé dixiplinadu impede Bafana Bafana atu kria oportunidade. Repúblika Xeka mantén vantajen 1-0 to’o intervalu.
Tama ba segunda parte, ritmu jogu nian la tun. Repúblika Xeka ataka kedas ho kabesa ida hosi Vladimir Darida no remate ida hosi Lukas Cerv, ne’ebé salva hosi guarda-rede súl-afrikanu. Treinadór xeku Miroslav Koubek hafoin ne’e hadi’a meiu-kampo hodi hatama fali jogadór suplente, Pavel Sulc no Jaroslav Zeleny iha minutu 55.
Áfrika Súl lakohi atu rende. Jogu iha klima ne’ebé manas maka’as, obriga árbitru atu hapara jogu ba deskansa iha minutu 69, Hugo iha oportunidade osan-mean ida ho kabesa iha minutu 75, maibé guarda-redes Xeka Matej Kovar halo salvasaun ne’ebé brillante.
Dezastre ikus mai akontese ba Repúblika Xeka iha minutu 82. Sira nia substitutu, Pavel Sulc, komete bola liman ne’ebé maka fatal iha área penalidade nian. Árbitru Tori Penso aponta kedas ba pontu penalti.
Teboho Mokoena, ne’ebé hakat ba penalti iha minutu 83, ho kalma diriji bola ba kraik iha kantu kraik karuk baliza nian, hodi lohi Matej Kovar monu ba sorin. Muda kedan eskore ne’e hanesan 1-1.
Iha minutu sira-ne’ebé restu, tensaun sira aumenta. Áfrika Súl besik atu halo tan golu iha minutu 88 se Relebohile Mofokeng nia suta hetan salvasaun ho eroiku hosi Matej Kovar.
Ofisiál sira jogu nian aumenta minutu hitu ba tempu adisionál nian. Repúblika Xeka hetan oportunidade hosi bola livre, maibé Jaroslav Zeleny nia kabesa iha minutu 90+2 la konsege tanba offside. To’o apitu finál, empata 1-1 sai rezultadu ne’ebé justu ba ekipa rua.
Ho rezultadu ida-ne’e, kompetisaun iha Grupu A Kopa Mundiál 2026 nian sei manas liután iha jogu sira tuirmai. Repúblika Xeka no Áfrika Súl iha grupu hanesan ho adversáriu potensiál rua seluk: Koreia-Súl no Méxiku.
Klasifikasaun Grupu A Kopa Mundiál 2026
1. Méxiku 3
2. Koreia-Súl 3
3. Repúblika Xeka 1
4. Áfrika-Súl 1
Xeko (3-5-2): Matej Kovar (PG); Robin Hranac, Tomas Holes, Ladislav Krejci; Vladimir Coufal, Michal Sadilek, Vladimir Darida, Lukas Cerv, Alexandr Sojka; Adam Hlozek, Patrik Schick.
Afrika Súl (4-3-3): Ronwen Williams; Khuliso Mudau, Ime Okon, Mbekezeli Mbokazi, Aubrey Modiba, Teboho Mokoena, Thalente Mbatha, Jayden Adams; Thapelo Maseko, Iqraam Rayners, Oswin Appollis.
Jornalista : Hortêncio Sanchez
Editór : Cancio Ximenes
