COVALIMA, 16 marsu 2022 (TATOLI)—Sekretariadu Tékniku Administrasaun Eleitorál (STAE) Covalima finaliza ona halo verifikasaun ba materiál sensitivu ho non sensitivu no halo ona pakotementu, prepara atu halo distribuisaun ba postu administrativu sira.
“STAE Covalima finaliza ona verifikasaun buletin votu agora kontinuasaun halo pakotementu materiál eleisaun sensitivu ho non sensitivu hodi prepara halo distribuisaun materiál eleisaun ba sentru votasaun sira,” Diretór STAE Covalima, Francisco Gusmão, relata ba Agência Tatoli, iha nia knar fatin, Kampung Baru, kuarta ne’e.
Hafoin brigada STAE hamutuk ho ófisiál CNE halo pakotementu materiál eleisaun sensitivu ho non sensitivu, bazea ba kalendáriu sei realiza serimonia distribuisaun materiál eleisaun iha loron 18 fulan-marsu tinan ne’e.
Durante halo verifikasuan materiál non sensitivu STAE la identifika buat ruma ne’ebé mak falta, nune’e STAE finaliza ona verifikasaun materiál sensitivu ho non sensitivu, agora halo hela prosesu pakotementu preparasaun atu halo distribuisaun materiál eleisaun ba iha sentru votasaun sira.
Enkuantu, STAE covalima simu materiál sensitivu ho non sensitivu iha loron 11 fulan-marsu ne’e ho totál livru buletin votu hamutuk 1070 no urna 240.
Dadus hosi STAE eleitór ne’ebé atu ezerse nia direitu iha loron 19 fulan marsu ne’e hamutuk 47,807 kompostu hosi mane 2,4446 no feto 2,336. Sentru votasaun iha munisípiu Covalima hamutuk 80 no estasaun votasaun 92.
Eleisaun prezidensiál sei realiza iha loron 19 fulan-marsu ne’e ho kandidatu prezidente Repúblika na’in-16.
Jornalista : Celestina Teles
Editór : Cancio Ximenes
