BAUCAU, HEADLINE, JUSTISA, LEI, MUNISÍPIU

TDB interroga ona arguidu na’in-tolu ba krime omisídiu Darsula

TDB interroga ona arguidu na’in-tolu ba krime omisídiu Darsula

Tribunál Distritál Baucau liuhosi julgamentu interrogatóriu dahuluk aplika medida koasaun aprezentasaun periódika ba arguidu na’in-tolu tanba deskonfia envolve krime omisídiu iha Darsula. Imajen Tatoli/Natalino Belo.

BAUCAU, 16 marsu 2022 (TATOLI) – Tribunál Distritál Baucau (TDB) liuhosi desizaun interrogatóriu dahuluk kuarta ne’e, aplika medida koasaun aprezentasaun periódika ba arguidu na’in-tolu ho inisiál DC, JFX no CJF ne’ebé deskonfia oho vítima João Ornai Ximenes, iha Darsula, suku Gariuai, postu administrativu Baucau Vila.

Kazu omisídiu ne’e akontese iha loron sábadu, 12 fulan-marsu 2022, bainhira mosu konfrontu entre membru grupu arte-marsiál hodi rezulta vitíma João Ornai Ximenes hakotu iss bainhira partisipa iha kampaña eleitorál kandidatu Prezidente Repúblika, Francisco Guterres ‘Lú Olo’.

Iha prosesu julgamentu interrogatóriu dahuluk taka ba públiku ne’e, Ministériu Públiku alega arguidu na’in-tolu ho indísiu komete krime omisídiu simples no integridade fízika simples ne’ebé prevista iha kódigu penál artigu 138 no 145.

Nune’e kódigu penál ne’ebé prevista iha artigu 138 kona-ba omisídiu simples, hateten ema ne’ebé oho ema seluk sei hetan pena prizaun tinan ualu to’o tinan 20.

Nune’e mós artigu 145 kona-ba ofensa ba integridade fízika simples, númeru 1 hateten, sé maka ofende ema seluk nia isin ka saúde sei hetan pena prizaun to’o tinan tolu ka multa no númeru 2 hosi artigu ne’e fundamenta, atu hala’o prosedimentu kriminál tenke iha keixa.

Defensór Públiku ne’ebé fó asisténsia legál ba arguido sira, José de Lima, esplika, arguidu na’in-tolu submete ona ba interrogatóriu dahuluk maibé prova la sufiente atu kondena tanba arguidu sira rekoñese partisipa iha kampaña maibé la envolve direita iha konfrontu.

“Parte defeza haree ba sirkuntánsia hotu no arguidu sira, parte defeza husu ba tribunál atu fó medida koasaun aprezentasaun periódika atu nune’e asegura ba investigasaun Ministériu Públiku nian,” Defensór Públiku, José de Lima hateten iha TDB, Vila Nova.

Ho alegasaun refere, arguidu sira sei aprezenta aan kada semana-ida iha loron segunda feira iha eskuadra Polísia Nasionál Timor-Leste (PNTL) atu kontrola nafatin nune’e koopera ho MP bainhira presiza atu halo investigasaun.

José de Lima akresenta, arguidu sira laiha intensaun atu subar evidénsia ruma tanba bainhira hetan kontaktu hosi autoridade lokál arguidu sira aprezenta aan kedas ba parte PNTL  nune’e parte defeza haree posibilidade iha autór prinsipál ba kazu omísidu refere maibé prosesu investigasaun mak sei bele hatene loloos.

“Parte defeza konkorda ho medida koasaun ne’ebé fó tanba asegura ba MP ninia investigasaun atu hatene loloos sé mak autór prinsipál,” José de Lima argumenta.

Antes ne’e, Polisía Nasionál Timor-Leste (PNTL) asegura arguidu na’in-tolu iha loron sábadu (12/03) no ezekuta mandadu detensaun hosi tribunál iha loron segunda (15/03) ho númeru NUC 0015/22.BCSTC.

Prosesu julgamentu ne’e prezide hosi Juiza Singulár Sribuana da Costa, Ministériu Públiku reprezenta hosi Prokuradór Bartolomeu de Araújo no arguido na’in-tolu hetan asistensia legál hosi Defensór Públiku José de Lima.

Notísia relevante: TDB adia prosesu interrogatóriu dahuluk ba kazu Darsula

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!