OÉ-CUSSE, 17 marsu 2022 (TATOLI) – Eleisaun prezidensiál períodu 2022-2027 hela de’it loron tolu, maibé Polísia Nasionál Timor-Leste (PNTL) ne’ebé atu asegura materiál sensitivu no la’ós-sensitivu iha de’it karreta ida iha Rejiaun Administrativa Espesiál Oé-Cusse Ambeno (RAEOA).
Komandante PNTL RAEOA, Superintendente Xefe, Mateus Assunção Mendes, informa, fasilidade transporte sai difikuldade ba komandu atu halo monitorizasaun iha elesaun prezidensiál iha rejiaun ne’e.
“Foin dadaun ne’e ami ba Dili, ha’u lori karreta rua, maibé labele transporta mai Oé-Cusse tanba kondisaun odamatan ró Berlin Ramelau ladi’ak, entaun ida-ne’e sai difikuldade ba PNTL, tán ne’e ha’u esperu, CNE ho STAE bele fasilita transporte hodi transporta membru efetivu-sira atu asegura materiál sensitivu no la’ós-sensitivu to’o sentru votasaun, to’o fila mai apuramentu distritál ho susesu,” Mateus Assunção Mendes, ko’alia iha salaun Alfándega, Palaban, Oé-Cusse, kinta ne’e.
Nia dehan, atualmente komandu distritál iha de’it karreta ida, ho patrulla, ne’ebé sei la garante atu kobre sub-rejiaun haat iha Oé-Cusse, maske nune’e PNTL esforsu husu ona apoia UPF ba karreta maibé kondisaun ladún di’ak, la posivel sa’e ba foho, nomoos submete ona pedidu apoia iha autoridade RAEOA maibé laiha resposta.
“Klaru, problema ne’e ha’u hato’o primeiru ba autoridade, maibé resposta dehan karreta laiha, depois ha’u enkamiña ba nasionál apoia karreta tolu, maibé foin daudaun ba Dili tula materiál mai Oé-Cusse, rua labele mai tanba transporte marítima, entaun só ida de’it mak ami sei uza ba monitorizasun iha loron eleisaun, ha’u-nia komandu jerál mós hatene ona ami-nia problema ne’e, maibé ami sei esforsa tuir kbiit ne’ebé iha,” Mateus Mendes hateten.
Diretora STAE RAEOA, Luiza da Costa, informa katak, prosesu transfere materiál sensitivu no la’ós-sensitivu ba sentru votasaun ho ekipa ida atu asegura sasán-sita to’o fatin ho susesu.
“Viatura parte STAE prepara ona 36, 10 ita aluga no 26 apoia hosi Governu, entaun prosesu atu tula materiál ba iha sentru votasaun ho ekipa ida de’it, hosi STAE, CNE no PNTL atu asegura sasán-sira ne’e to’o fatin, depois remata apuramentu votasaun nafatin akompaña mai to’o apuramentu distritál, ne’ebé ekipa ne’e sei aranka ba sentru iha loron sesta 18 marsu ne’e,” nia katak.
Entretantu, totál eleitór ne’ebé sei partisipa iha eleisaun prezidensiál 19 marsu 2022, iha RAEOA hamutuk 51.495 komposta hosi mane 26.232 no feto 25.263, ho totál sentru votasaun 60 no estasaun votasaun 88, ne’ebé sei envolve brigadista na’in-60 no ofisiál eleitorál na’in-880.
Jornalista : Abílio Elo Nini
Editór : Evaristo Soares Martins
