DILI, 17 marsu 2022 (TATOLI)—Reabilitasaun Eskola Ensinu Báziku Filiál (EBF) Duque de Caxias, Bemori, ne’ebé tama iha projetu komunitáriu hosi Diresaun Nasionál Infraestrutura Edukativa (DNIE) hosi Ministériu Edukasaun Juventude no Desportu (MEJD), hahú daudaun ona.
Tuir Koordenadora Eskola EBF Duque de Caxias, Eliza Martins, pakote reabilitasaun ba eskola ne’e kompostu hosi sala aula tolu no toilet ida, foin maka kontinua filafali tanba mosu difikuldade balun hanesan badaen ne’ebé eskola fó fiar retira ninia kontratu hodi impede prosesu reabilitasaun ne’e.
“Iha inísiu ita kontratu tiha badaen na’in-rua hodi hala’o prosesu reabilitasaun, maibé to’o semana rua sira lakohi kontinua tanba razaun oin-oin, entaun impede prosesu sira, maibé agora ita hetan fali ona badaen seluk ne’ebé prosesu la’o fali ona,” Koordenadora eskola informa ba Agência TATOLI, iha Eskola Bemori, kinta ne’e.
Notísia relevante: DNIE sei hadi’a sala aula tolu eskola Duque de Caxias
Maski nune’e, Dirijente eskola sira kontinua akompaña prosesu reabilitasaun infraestrutura eskola no husu nafatin badaen sira serbisu ho responsabilidade atubele konklui projetu ne’e iha fulan-jullu nia-laran, tanba projetu ne’e ho durasaun fulan-neen.
Totál kustu projetu ne’ebé Ministériu Finansa (MF) transfere ona ba konta bankária eskola hamutuk $40.000, ne’ebé eskola sei jere hodi realiza reabilitasaun, maibé sei foti tuir ninia prosesu.
“Faze dahuluk foti 25%, hafoin aprezenta relatóriu ba Governu maka foti tan 25% ba faze daruak, nune’e ba faze datoluk mós hanesan, maibé tama ba faze dahaat tuir prosedimentu sei foti de’it 15% tanba 10% sei husik hela iha konta bankária,” Koordenadora eskola esplika.
Iha eskola hamutuk 204 iha territóriu nasionál mak tama iha planu projetu komunitáriu ba reabilitasaun sala aula 675, ne’ebé hosi númeru ne’e, eskola iha Dili hamutuk 16 mak benefisia ba programa ne’e no tuir planu implementasaun projetu tenke ramata iha tinan ne’e.
Jornalista : Tomé Amado
Editora : Julia Chatarina
