DILI, 18 marsu 2022 (TATOLI)—Ministériu Koordenadór Asuntu Ekonómiku (MKAE), no ministériu implementadór hanesan Ministériu Turizmu, Komérsiu no Indústria (MTKI), no Sekretaria Estadu Kooperativa (SEKoop), realiza reuniaun koordenasaun servisu molok implementa programa cesta bázika iha tempu badak.
Ministru Koordenadór Asuntu Ekonómiku, Joaquim Amaral, hateten reuniaun ne’e importante tanba programa ne’e sei implementa iha tinan ne’e nia-laran.
“Cesta Bázika faze dahuluk taka ona iha 30 dezembru 2021 no rezultadu estudu hosi United Nations Development Programme (UNDP) kona-ba impaktu hosi distribiuisaun Cesta Bázika faze dahuluk, hatudu katak populasaun barak (80%) inklui emprezáriu sira dezeju atu programa ne’e bele iha kontinuasaun,” Ministru Joaquim informa liuhosi konferénsa imprensa ne’ebé hala’o iha salaun TradeInvest, Colmera, sesta ne’e.
Notísia relevante: Governu ofisialmente enserra distribuisaun Cesta Bázika
Tanba ne’e, ho avaliasaun pozitivu sira maka Parlamentu Nasionál aprova tan verba iha Orsamentu Jerál Estadu (OJE) 2022 ho montante millaun $80 atubele fó kontinuasaun ba distribuisaun Cesta Bázika faze daruak nian, ne’ebé sei implementa hosi MTKI no SEKoop.
“Komisaun téknika hosi ministériu implementadór indijita ona, kompoin ona iha despaixu konjuntu komisaun téknika ba sekretariadu atu koordena ajuda ministériu implementadór sira. Ekipa ida-ne’e konstituidu ona, tanba ne’e reuniaun ne’e atu aserta koordenasaun servisu entre sekretariadu hodi define kalendáriu ba implementasaun,” nia akresenta.
Aleinde ne’e, reuniaun ne’e hodi aprova kalendáriu ba distribuisaun medida Cesta Bázika faze daruak nian.
Biban ne’e, Ministru Joaquim informa ba públiku katak tempu badak Governu sei implementa programa Cesta Bázika, tanba ne’e empreza sira ne’ebé iha interese bele partisipa.
Foin lalais, Governu liuhosi reuniaun Konsellu Ministru (KM) aprova ho alterasaun, medida distribuisaun Cesta Bázika ba família timor-oan sira ne’ebé presiza liu no apoiu operadór ekonómiku lokál bele kria rejime espesiál kona-ba aprovizionamentu, iha ámbitu planu rekuperasaun ekonómika.
Notísia relevante: Governu aprova distribuisaun Cesta Bázika ba família rendimentu menus $500
Ho Projetu Dekretu-Lei ne’e, Governu hakarak kontinua fó produtu nesesidade dahuluk no garante sustentabilidade família, ne’ebé iha tempu hanesan atu kria kondisaun normalidade ba atividade produtór no operadór ekonómiku nasionál sira tanba prokura menus.
Cesta Bázika ne’e fiksa ho valór $50 ba membru ida-idak iha uma-kain sai benefisiáriu no sei distribui durante tinan 2022.
Cesta Bázika iha faze ne’e kompostu hosi produtu ai-han no sasán ijiene pesoál, hanesan deskrisaun kuantidade no folin sei define liuhosi despaixu konjuntu membru Governu, ne’ebé responsável iha área komérsiu, indústria no kooperativa sira. Produtu lubun ida-ne’e bele troka ho ‘voucher’ hodi sosa sasán sira.
Ho diploma ne’e, prosesu akizisaun no distribuisaun Cesta Bázika limite ba kooperativa no operadór ekonómiku sira ne’ebé konstitui formalmente, ne’ebé laiha dívida ba autoridade tributária no maioria hosi kapitál sosiál sosiedade ne’ebé detida hosi timor-oan ida-idak.
Antes ne’e, Governu implementa progama Cesta Bázika ne’ebé benefisia timor-oan hotu hamutuk 1.491.661 kabaze, iha aldeia 2.234 hosi suku 452.
Programa ne’e implementa durante fulan-14, ne’ebé envolve empreza nasionál hamutuk 218.
Jornalista : Antónia Gusmão
Editora : Julia Chatarina
