LAUTÉM, 18 marsu 2022 (TATOLI)—Kandidatu Prezidente Repúblika (PR) independente ba períodu 2022-2027, ho númeru sorteiu 08, Tito da Costa Cristóvão ‘Lere Anan Timur’, sesta ne’e, hamutuk ho sarani postu administrativu Iliomar, munisípiu Lautém, halo misa agradesimentu ba kampaña semana-rua ne’ebé ramata ho di’ak.
Durante prezide misa, Amu pároku, Igreja Nossa Senhora Maria Auxiliadora, Iliomar, Luís Pedro Claver Barros, agradese ba Kandidatu PR Lere Anan Timur, ne’ebé ohin mai hamutuk ho família no sarani Iliomar halo misa agradesimentu, tanba durante semana-rua nia laran hala’o kampaña hosi rai ulun to’o rai ikun no tasi-feto to’o tasi mane, ne’ebé buat hotu la’o di’ak tanba Maromak nia grasa.
“Ha’u husu ba sarani sira, evanjellu São Mateus, hateten, nia sei fó to’os ne’e ba ema seluk kaer, ba ema ne’ebé to’o nia loron bele lori ai-fuan mai, iha tempu kuarezma fó hanoin no bolu ita atu hato’o sentimentu amizade ba malu nu’udar ema kriatura, sei hetan tentasaun maibé sé mak iha fiar ba Maromak, sei sai ema boot no felisidade ba ema tomak,” Padre selebrante Luís Pedro, hateten liuhosi nia omília, iha Igreja Maria Auxiliadora, Iliomar.
Notísia relevante: Kandidatu PR Lere Anan Timur hahi lema “Marka Diferensa”
Biban ne’e, nia konvida sarani sira atu reflete evanjellu São Mateus, ne’ebé aprezenta ema ne’ebé iha fiel, onestu, sinseru, no maturidade presisténsia, ne’ebé refere ba konteksu Timór, aban sidadaun sira sei partisipa Eleisaun Prezidensiál atu hili Prezidente Repúblika foun.
“Tau ema ne’ebé loos iha nia fatin, nune’e tuir Jesus hanorin hodi halo buat ne’ebé loos no tuir dalan, ne’ebé ita tau konfiansa ba ema ne’ebé ita koñese, nune’e bele lori rai ne’e ba oin, hanesan Jesus haruka ita lori lia loos ba mundu. Ita tenke halo diferensa ba ita-nia moris, ha’u tau fiar ba ema ne’ebé hatene ko’alia no fiel iha nia moris,” nia tenik.
Iha fatin hanesan, hafoin misa agradesimentu, Kandidatu PR Lere Anan Timur, hateten, objetivu ohin hamutuk ho nia espoza no família Iliomar halo misa agradesimentu tanba nu’udar ema kristaun ne’ebé la haluha Maromak bainhira simu grasa.
“Ami foin mai hosi Dili, ha’u mai halo misa agradesimentu ne’e iha ne’e, tanba Iliomar mak ha’u-nia rai lulik ne’ebé ha’u moris bá, ohin kalan ita halo misa agradesimentu hanesan tradisaun ida, ne’ebé durante ne’e ha’u halo kampaña semana rua-nia laran no tanba ha’u ema katólika, Maromak, lulik, matebian sira ne’ebé mate tanba rai ida-ne’e mak ha’u-nia forsa, nune’e ha’u mai husu misa atu husu sira fó forsa ba ha’u,” nia dehan.
Nia mós husu ba komunidade Iliomar katak aban (19/03) loron eleisaun, tenke hili ema ne’ebé bele lori rai Timór ba oin.
“Ha’u osan laiha atu fahe ba imi, maibé nu’udar Iliomar-oan ne’ebé kandidata-an hakarak sai Prezidente Repúblika, ha’u husu imi hotu vota ba ha’u, tanba ha’u sai Prezidente nu’udar iliomar-oan no rai lulik Timor-Leste nia naran mak ba, nune’e imi hotu fó fiar ba ha’u, ida-ne’e ha’u fiar katak, ha’u sei manán iha eleisaun tinan ne’e,” Lere dehan.
Iha eleisaun aban, Lere hamutuk ho nia família sei vota iha nia moris fatin Iliomar.
Jornalista : Arminda Fonseca
Editora : Julia Chatarina
