BOBONARO, 18 marsu 2022 (TATOLI) – Sekretariadu Tékniku Administrasaun Eleitorál (STAE) no sasin hosi Komisaun Nasionál Eleisaun (CNE, sigla portugés) Munisípiu Bobonaro, sesta ne’e distribui ona materiál eleisaun prezidensiál ba sentru votasaun 130 no estasaun votu 150.
Serimónia distribuisaun ne’e hala’o iha edifísiu STAE Bobonaro no loke ofisialmente hosi Sekretáriu Autoridade Munisípiu Bobonaro, João Fátima do Carmo, no asina termu entrega hosi Diretór STAE Bobonaro, Mariano Viegas Amaral ba Komandante PNTL Bobonaro, Superintendente Antoninho Mauluta no sasin hosi Komisáriu destakadu CNE Bobonaro, Domingos Barreto.
Materiál eleisaun fahe parte rua kompostu hosi materiál sensitivu mak hanesan livru 1.584, buletin votu 79.200 hamutuk kaixa 28 no karimbu ho tinta. Enkuantu materiál la’ós-sensitivu sira mak hanesan, kaixote, akta rezultadu eleisaun, formuláriu reklamasaun, pasta, fita no stop map.
Materiál hirak-ne’e transporta ho karreta estadu, hosi diresaun patrimóniu estadu, autoridade munisípiu inklui balun aluga ho totál karreta 20 no kada karreta ida sei hetan seguransa másima hosi PNTL, akompana hosi brigadista sira no ofisiál supervizaun CNE.
Diretór STAE munisípiu Bobonaro, Mariano Viegas Amaral, hateten, prosesu ne’e nu’udar faze determinate hosi preparasaun lubuk ida, tanba ne’e presiza kontribuisaun hosi autoridade munisipál to’o lokál atu apoiu ekipa ne’ebe destakadu iha sentru votasaun tomak nune’e bele hatudu rezultadu efisiénsia no efikásia.
“STAE sai forti liután kuandu hetan apoia hosi entidade hotu tantu hosi sivíl, militár no polítiku sira iha eventu eleisaun ida-ne’e, nune’e kuandu iha hotu koñesimentu ba lei, regulamentu no prosedimentu sira eleisaun nian,” nia katak.
Sekretáriu Autoridade Munisípiu Bobonaro, João Fátima do Carmo, prontu apoia prosesu eleisaun ida-ne’e tomak, tamba ne’e orienta ona líder lokál sira kompostu husi xefe aldeia to’o xefe suku atu koopera ho ekipa STAE no CNE ne’ebé destaka iha sentru votasaun hotu-hotu nune’e prosesu eleisaun ne’e bele rezulta di’ak.
“Iha momentu ida-ne’e marka tán istória tán ba ita-nia munisípiu Bobonaro no ba ita-nia nasaun, tanba festa demokarasia ida-ne’e tinan lima ita selebra dala-ida, tanba ne’e husu komponente no ekipa tomak atu koopera hamutuk hodi ita-nia festa demokrasia ida-ne’e bele la’o ho susesu,” nia apela.
Enkuantu Komandante PNTL Munisípiu Bobonaro, Antoninho Mauluta, orienta ona membru sira atu halo seguransa másima iha sentru votasaun no estasaun votu ne’ebé estabelese iha postu administrativu hotu-hotu hodi garante pás no estabilidade.
“Ita-nia membru limitadu tanba ne’e ita koloka de’it sentru votasaun ida ema na’in-ida, maibé importante liu mak imi servisu hamutuk ho brigadista, ofisiál eleitorál tenke hamutuk, tanba ne’e ha’u fiar prosesu ne’e la’o ho susesu,” nia katak.
Vise-Prezidente CNE Nasionál, Domingos Barreto, husu ba ekipa brigada no ofisiál CNE ne’ebé destaka iha sentru votasaun sei presta serbisu ho profisionál hodi garante neutralidade no imparsiál.
“Susesu ba eleisaun ida-ne’e iha CNE ho STAE nia liman, maibe krime eleitorál mos tuir hela ita iha kotuk, tanba ne’e tenke serbisu tuir lei,” nia akresenta.
Serimónia ne’e partisipa hosi Vise-Prezidente CNE, Domingos Barreto, Komandante Unidade Patrullamentu Fronteira (UPF), Superintendente Euclides Bello, administrador postu administrativu sira, diretór munisípiu no diretór delegasaun territoriál sira, obervador nasionál no internasionál sira, fiskál partidu polítiku no ekipa susesu hosi kandidatu Prezidente da Repúblika na’in 16.
Jornalista : Sérgio da Cruz
Editór : Evaristo Soares Martins
