Maubisse, 19 marsu 2022 (TATOLI)—Sidadaun hotu iha Timor-Leste partisipa iha festa Demokrasia Elisaun Prezidensial Repúblik ba períodu 2022-2027. Iha Suku Maubisse Vila, munisípiu Ainaro, iha eleitór 4.000 mak partisipa Elisaun Prezidensial.
Xefi Suku Maubisse Vila, Munisípio Ainaro, Wilson Nivio Maria Pereira Mendonça informa Suku ne’e iha estasaun lima no komunidade sira partisipa ho maximu durante prosesu eleisaun.
“Total eleitór sira ne’ebe iha Suku Maubisse hamutuk 4.000. Sira ne’e ezerse sira nia direitu votus,” hateten Xefi Suku, Wilson Nivio Maria Pereira Mendonça ba jornalista iha nia kna’ar fatin, Maubisse Vila, sabadu ne’e.
Nia dehan, durante elisaun, hetan seguransa maximu husi eskuadra Polisia Nasional Timor Leste (PNTL) postu Maubisse Vila, iha kada sentru votasaun.
Total Aldeia iha Suku Maubisse Vila iha 12, ho total populasaun 7.116, no eleitó 4.000. “ Total ema ho difisiensia hamutuk 50. Sira ne’e mos partisipa iha eleisaun no hetan ajuda husi sira nia familia hodi lori mai iha Sentru Votasaun,” Wilson dehan.
Parte seluk, iha Postu Administrativu Maubisse, Munisípiu Ainaro iha total eleitores 6.771 ne’ebé mai husi suku sia, aldeia 62. Sira hetan resensiamentu husi STAE hodi tuir votasaun, iha postu refere.
Reporter : Mirandolina Barros Soares
Editor : Armandina Moniz
