DILI, 19 marsu 2022 (TATOLI)—Kandidatu Prezidente Repúblika (PR) períodu 2022-2027 ho númeru sorteiu 01, Isabel da Costa Ferreira, espera povu Timor-Leste sei hli Prezidente Repúblika ne’ebé hadomi no sei tau matan povu.
“Ohin, loron 19 ita hotu mai ezerse ita-nia direitu ba hili ita-nia Prezidente Repúblika. Ha’u espera povu Timor-Leste halo desizaun ne’ebé loos no di’ak atu hili Prezidente Repúblika ida-ne’ebé hadomi povu atu tau matan ba povu no rai ida-ne’e hodi bele liberta povu hosi terus no ki’ak,” Isabel da Costa Ferreira hateten ba jornalista sira, hafoin vota iha Eskola Primária Filiál Metiaut, Dili, sabádu ne’e.
Nia deseiju, eleisaun ne’e la’o di’ak atu bele hetan rezultadu ida-ne’ebé di’ak no tuir povu nia hakarak, no rezultadu saida de’it mak akontese timor-oan hotu tenke simu.
“Ha’u hakarak Prezidente Repúblika ida mais prósimu no prezidente ida besik povu, hamutuk povu no ki’ak sira atu ajuda sira sai hosi terus no ki’ak liu-liu ajuda sira-nia oan sira atu hetan oportunidade ba eskola no empregu. Tanba ho eskola no matenek mak bele muda sira-nia vida, muda familia no Nasaun. Tanba ne’e, ha’u iha esperansa eleisaun ba tinan ne’e la’o di’ak no ita hein no ita hotu simu rezultadu tuir saida mak povu nia hakarak,” nia dehan.
Entretantu, iha suku Metiaut ne’e iha sentru votasaun rua mak sentru votasaun ida iha sede suku Metiaut no ida seluk iha Eskola Primária Filiál Metiaut.
Eleisaun ne’e hetan observaaun hosi observadór nasionál, internasionál, fiskál hosi kandidatu sira, brigadista, ofisiál eleitorál hosi Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés) no hetan seguransa másimu hosi Polísia Nasionál Timor-Leste (PNTL).
Totál votante iha sentru votasaun iha suku Metiaut hamutuk 1.309, ne’ebé mai hosi aldeia tolu, hanesan aldeia 17 de Abril, Fatucama no Carungulau.
Jornalista : Nelia Fernandes
Editór : Cancio Ximenes
