DILI, 19 marsu 2022( TATOLI)-Reprezentante kuziñeiru Hospitál Nasionál Guido Valadares (HNGV), Juliana Ribeiro Viegas, hateten sira-nain sia mak lakon direitu hodi partisipa eleisaun prezidensiál tinan ne’e, tanba kartaun eleitorál hosi munisípiu seluk.
“Ha’u ho ha’u nia maluk nain ualu sira seluk la aseita tanba STAE halo diskriminasaun kona-ba ami-nian direitu vota ba Prezidente Repúblika període 2022- 2027”, dehan Juliana ba TATOLI iha HNGV, sábadu ne’e.
Nia hatutan tan: “Ami sente lakon direitu tanba nu’udar sidadaun RDTL iha direitu hanesan atu vota bazea ba konsensia rasik no tuir ami hakarak”.
Votante ne’ebé lakon direitu ne’e dehan, antes ne’e Sekretariadu Tékniku Administrasaun Eleitorál rekolla ona dadus eleitorál iha HNGV no promete katak staf HNGV ne’ebé kartaun eleitorál iha munisípiu bele rejistu iha HNGV hodi vota.
“Antes ne’e STAE mai rejistu ona ami nia kartaun eleitorál hodi tuir vota iha HNGV ohin, maibé bainhira ami forma hodi ba tuir vota, ami nia naran laiha fali no dehan labele tuir votasaun tanba naran iha baze dadus husi STAE nian laiha, entaun ami nain sia labele tuir vota”, nia dehan.
Nia protesta STAE tanba organiza eleisaun ne’ebé la efetivu, tanba ne’e STAE tenke responsibiliza ba aktu irregularidade ne’e.
Númeru votante husi pasiente no família pasiente hamutuk 472 inklui asisténsia médiku hamutuk 363 iha HNGV ne’ebé ezerse ona sira nia direitu vota iha eleisaun prezidensiál.
Jornalista : Camilio de Sousa
Editora : Rita Almeida
