BAUCAU, 19 marsu 2022 (TATOLI)–Inan kbiit laek no defisiénsia sira hosi suku Uato-Haco, postu administrativu Venilale, munisípiu Baucau, kontinua ezerse sıra-nia votu iha sentru votasaun, maske la’o distánsia kilómetru 12.
Relasiona ho distánsia ne’ebé dook, votante Virgínia Correia Belo, hateten difikuldade mak distánsia ne’ebé dook no laiha transporte atu lori sira ba sentru votasaun.
“Ami iha difikuldade tanba inan-ferik sira no defisiénsia sira laiha transporte atubele lori mai iha sentru votasaun maibé ami la’o neneik, sai hosi uma tuku 06:00 ho distánsia ne’ebé dook tebes, maibé tanba atu hili ita-nia prezidente tenke esforsu to’o sentru sentru votasaun”, votante Virgínia Correira Belo, ko’alia iha Venilale, hafoin vota, sábadu ne’e.
Votante ne’e hatutan, atu kandidatu sé de’it mąką eleitu tau matan ba povu, tenke husu Governu hadi’a estrada nune’e fasilita komunidade asesu ba merkadu hodi fa’an no sosa sasán.
Xefe suku Uato-Haco, Crisostomo Correia, hateten iha suku refere iha aldeia haat mak hanesan, Uatu-asa, Uaitalibu, Liabala no Osogori.
“Ami iha-ne’e iha aldeia haat, aldeia rua maka distánsia dook, idą Osogori kilómteru 12 no Liabala kilómteru 11, dezde uluk ami ezije no agora estabelese ona sentru votasaun iha aldeia rua ne’e”, Xefe suku Uato-Haco esplika.
Xefe suku Uato-Haco ne’e organiza ona xefe aldeia sira atu prepara karreta atubele fasilita votante sira hanesan inan-faluk no defisiénsia sira.
“Defisiénsia ne’ebé ohin mai ona vota hamutuk na’in-haat no ami organiza ami-nia xefe aldeia sira atu prepara karreta hodi tula sira mai iha sentru votasaun ne’e, hanesan mós ho inan kbiit laek sira”, Xefe suku uato-Haco hateten.
Suku Uato-Haco kompostu hosi aldeia haat ne’e iha uma-kain 369 ho totál populasaun 3.796.
Jornalista : Jogerjo Guterres
Editór : Evaristo Soares Martins
