AINARO, ELEISAUN, MUNISÍPIU

Povu nia lian: Prezidente tenke aselera dezenvolvimentu  

Povu nia lian: Prezidente tenke aselera dezenvolvimentu     

Sentru votasaun iha Suku Maubisse Villa, Munisipio Ainaro. Foto Tatoli/Mirandolina Barros Soares

MAUBISSE, 19 marsu 2022 (TATOLI)—Povu Timor-Leste (TL) hein katak futuru Prezidente Repúblika ne’ebé mak sei eleitu iha períodu 2022-2027, atu bele aselera dezenvolvimentu Nasaun ho di’ak liután.

Autoridade Lokál, Wilson Nivio Maria Pereira Mendonça. Foto Tatoli/Mirandolina Barros Soares

“Ami nian esperansa ba futuru Prezidente ne’ebé povu fó fiar atu ba oin hadia sistema Nasaun, liu-liu iha lei. Nune’e bele aselera dezenvolvimentu hodi la’o ho di’ak iha ita nian Nasaun ne’e”, hateten Xefi suku Maubisse Villa, munisípiu Ainaru, Wilson Nivio Maria Pereira Mendonça ba jornalista iha Maubisse Vila, sábadu ne’e.

Nia hatutan, votu iha povu nia liman, ukun mos iha povu nia liman, depende sé mak povu fó fiar hodi sai prezidente atu lori Nasaun Timor-Leste ba oin.

“Tanba ne’e mak, sé de’it mak sai aman ba Nasaun ne’e, tau importansia ba interese Nasaun nian, liu-liu ba dezenvolvimentu sai di’ak liutan,” nia afirma.

Domingas Mendonca nu’udar Povu. Foto Tatoli/Mirandolina Barros Soares

Alende ne’e votante, Domingas Mendonca dehan, sé de’it mak eleitu presiza tau atensaun ba edukasaun no povu nian moris di’ak.

“Ha’u husi Maubisse, aldeia Sara. Ha’u ho ha’u nia kaben no oan sira la’o husi uma mai to’o sentru votasaun, oras rua ho balun tanba hakarak hili prezidente ne’ebé di’ak iha futuru”, nia dehan.


Alberto Madeira de Andrade nu’udar Povu. Foto Tatoli/Mirandolina Barros Soares

Parte seluk, votante Alberto Madeira de Andrade, maske ho kondisaun difisiensia tenke la’o ho ai-tongka ba sentru votasaun Eskola Bázika Sentrál Maubisse Vila hodi ezerse direitu.

Alberto Madeira de Andrade nu’udar vítima torturasaun husi militár Indonézia, ho idade 76, husi aldeia Hato-Fae, suku Maubisse Vila, munisípiu Ainaru, la’o ho ai-tongka ne’ebé hetan ajuda husi família lori nia ba to’o sentru votasaun.

Nia dehan, nu’udar sidadaun tenke vota. Tanba TL ukun rasik an ona. “Ita tenki vota, tanba hakarak duni ita nia rain ba moris di’ak”, nia hatete. Nu’udar povu, nia hein katak prezidente ne’ebé mak eleitu sei tau matan ba povu.

Postu Administrativu Maubisse, Munisípiu Ainaru, iha totál eleitór 6.771 ne’ebé mai husi suku sia, aldeia 62. Eleitór sira ne’e hetan resensiamentu husi Sekretariadu Tékniku administrasaun Eleitorál (STAE) hodi tuir votasaun.

Jornalista       : Mirandolina Barros Soares

Editora           : Armandina Moniz

iklan
iklan

Leave a Reply

iklan
error: Content is protected !!