DILI, 19 marsu 2022 (TATOLI)—Servisu Tékniku Administrasaun Eleitorál (STAE) no Komisaun Nasionál ba Eleisaun (CNE, sigla portugés) munisípiu Dili provizóriamente to’o tuku 21.00 ne’e simu ona urna husi sentru votasaun hamutuk 25.
“Provizoriamente dadus husi sentru votasaun ne’ebé mak tama ona iha asembleia munisipál Dili hamutuk 25”, Diretór CNE Munisípiu Dili, Adelino de Oliveira Maia, ba Tatoli, sábadu kalan ne’e.
Diretór CNE ne’e mós informa, kuandu urna sira ne’e to’o ona iha sentru apuramentu sei kontinua kedas ba prosesu apuramentu atu bele konfirma fila fali rezultadu kontajen ne’ebé iha ona.
“Dadaun ne’e prosesu apuramentu munisipál mós la’o dau-daun ona, iha ne’abá kuaze akta husi sentru votasaun lima mak input ona ba iha sistema dijitalizasaun STAE”, nia hateten.
Durante halo apuramentu akompaña mós husi reprezentante kandidatu sira husi Francisco Guterres Lú Olo (6), Lere Anan Timur (8), Armanda Berta dos Santos (9), José Ramos Horta (14) no Mariano Assanami Sabino (16). Enkuantu ba kandidatu sira seluk la konsege partisipa.
Maske nune’e, Adelino de Oliveira Maia, husu atu kada kandidatu bele delega fiskais nune’e bele akompaña didiak prosesu apuramentu refere.
“Ita haree katak ba daun-daun ne’e reprezentante mai husi kandidatu potensia sira, maibé kandidatu sira balun nia fiskais la partisipa”, diretór ne’e konfirma.
Nia esplika maioria urna husi sentru votasaun 25 ne’ebé temi, mai husi postu administrativu sira hanesan Kristu Rei, Don-Aleixo, Nain-Feto, Vera-Cruz. Enkuantu ba sentru votasaun sira seluk sei kontinua halo kontajem votu no sei transporta mai salaun INFORDEP bainhira prosesu kontajen termina no kontinua ba apuramentu.
Tuir dadus atuál husi STAE, totál sentru votasaun hamutuk 130 ho estasaun votu 237, totál eleitór hamutuk 190710 husi suku 36, postu administrativu neen.
Notísia relevante: RAEOA hahú hala’o apuramentu munisipál ba sentru votasaun 29
Jornalista : Cidalia Fátima
Editora : Rita Almeida
