AILEU, 20 marsu 2022 (TATOLI)—Polisia Nasional Timor Leste (PNTL) liu husi Komandante PNTL Munisipio Aileu, Jorge Monteiro informa eleitór ida ho naran Alberto Pereira mota lori, wainhira hakur mota atu ba vota iha Sentru Votasaun Munisípiu Aileu.
“Iha loron 18 marsu 2022, maizumenus iha tuku 20:00 OTL, iha komunidade ida, husi suku Aisirimou, Aldeia Bercati, Bairu Wahu, Munisípiu Aileu ho identidade Alberto Pereira, idade 52 mota lori,” hateten Superintedente PNTL Munisipio Aileu, Jorge Monteiro ba jornalista iha STAE Aileu, sabadu ne’e.
Nia isplika, tuir kronolojia katak iha ema nain tolu mak hamutuk ho Alberto. Sira mak hanesan Alberto ninia kaben, nia oan ho subrinho. Sira sai husi uma atu ba Asirimou.
“Kalan ne’e, mota tun, ho nune’e matebian konsege lori nia kaben hakat liu ona ba mota sorin, depois nia fila fali ba mota sorin atu foti nia oan. Maibe wainhira nia foti tiha nia oan, mota konsege mai boot, no halo nia mout, maibe nia oan ho nia subrinho konsege salva an,” dehan Komandante PNTL Munisipiu Aileu ne’e.
Matebian ho nia familia hakur mota iha tempu kalan (18/03) tanba prepara ba loron 19 marsu 2022 hodi ba tuir elisaun Prezidensial iha sentru Votasaun Munisipio Aileu.
Hafoin akontesementu parte husi PNTL inklui bombeirus hamutuk ho komponente Munisípiu Aileu halo kedan esforsu hodi buka mate isin, maibe to’o kalan ne’e seidauk hetan mate isin.
Nia dehan, esforsu hotu PNTL munisípiu Aileu halo’o atu bele hetan mate isin, maibe seidauk hetan. Ho nune’e parte autoridade sei kontinua mantein buka to’o hetan.
Jornalista : Mirandolina Barros Soares
Editorá : Armandina Moniz