Apuramentu nasionál sei hahú aban
DILI, 21 marsu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten aban sei hahú hala’o apuramentu nasionál.
“Aban ne’e ita komesa ona halo apuramentu nasionál ba buletin votu sira,” Prezidente CNE ne’e hateten ba jornalista sita iha konferénsia imprensa hodi informa kona-ba prosesu votasaun, kontajen no apuramentu munisipál no nasionál, iha salaun CNE, Dili, segunda ne’e.
Tuir nia, materiál eleisaun hosi munisípiu hitu mak lori ona mai iha CNE no aban loron ikus nian mak Rejiaun Administrativa Espesiál Oé-Cusse Ambeno (RAEOA), nune’e aban komisária sira halo plenária hafoin hahú halo apuramentu nasionál, no konteúdu hosi apuramentu ne’e atu verifika rezultadu akta hosi munisípiu sira.
“Iha numerika ruma ne’e ita presiza atu hadi’a, nune’e mós verifika fali votu nulu sira-ne’ebé mak ita bele dehan kuaze 10.000-resin no mós votu reklamadu sira, depois mak CNE hola desizaun katak ida-ne’e validu ka nafatin,” nia dehan.
Aleinde ne’e, CNE sei fó tempu ba kandidatu sira karik sira complain buat ruma, tempu ne’ebé legál CNE sei fó ba sira maibé karik laiha mak CNE sei submete ba Tribunál Rekursu.
“Apuramentu importante tanba ne’e votu ne’ebé mai ita sei deside no ninia konteúdu ne’e aumenta mak iha, diminui ne’e laiha. Aumenta siginifika votu nulu no reklamadu sei aumenta ba kandidatu sira. Tanba ema-nia intensaun ne’e loos hela, ita-nia sosiedade katuas-ferik sira dala ruma sira vota liman nakdedar ka ladún haree tanba ne’e sei haree no aumenta ba kandidatu sira,” nia hateten.
CNE halo servisu ho imparsialidade, neutru no asegura kandidatu sira-nia direitu votu tanba votu ida-nia valór mós ba kandidatu ida, tanba ne’e aban tempu legalmente atu hahú apuramentu nasionál.
Kesatun seluk, nia hateten, situasaun pandemia COVID-19 muda oráriu (schedule) ida kona-ba aviaun ne’ebé mak atu lori materiál eleisaun hosi diaspora mai Timor-Leste.
Tuir planu buletin votu iha diáspora to’o iha Timor-Leste iha loron 27 marsu, maibé tuir lei dehan apruramentu to’o de’it loron tolu mak hahú aban no sei termina iha loron 24 marsu 2022.
“Karik to’o tempu mak buletin votu hosi diáspora seidauk bele to’o mak iha mós dalan legal atu bele estende tan, nune’e bele konklui,” nia dehan.
Jornalista : Osória Marques
Editór : Cancio Ximenes
