ERMERA, 21 marsu 2022 (TATOLI) – Prezidente Autoridade Munisípiu (PAM) Ermera, Eusebio Salsinha, kongratula eleitór iha munisípiu Ermera laran tomak ba sira-nia partisipasaun iha Eleisaun Prezidensiál Periódu 2022-2027.
Durante ninia diskursu iha sede STAE munisípiu Ermera, Eusebio Soares kongratula CNE, STAE, PNTL, Observadór Uniaun Europeu no fiskais partidu polítiku sira ba sira-nia serbisu hamutuk hodi hala’o eleisaun prezidensiál ho susesu iha munsípiu Ermera.
“Lori komunidade Ermera laran tomak nia naran, ha’u hakrak agradese no kongratula STAE, CNE, PNTL, Fiskais no Observadór Internasionál sira, liu-liu Uniaun Europeia, tanba ita hotu nia serbisu hamutuk, eleisaun iha Munisípiu Ermera la’o ho hakmatek no di’ak tebes,” Soares ba journalista sira iha sede STAE, Ermera-Gleno, segunda ne’e.
Nia dehan PNTL hatudu ona ninia kna’ar ho profesionalidade hodi asegura eleisaun la’o ho di’ak iha munsipiu Ermera: “Ha’u-nia parabéns espesiál ba PNTL munisipiu Ermera, ne’ebé kumpri duni ninia misaun hanesan ajénsia implementadór lei no orden hodi asegura prosesu eleisaun tomak iha munsípiu Ermera ho susesu.”
Autoridade munisipál ne’e mós agradese ba kontribuisaun husi partidu politiku sira-nian hodi kria paz durante eleisaun iha munsípiu refere.
“Ita loke pájina foun ida iha istória Ermera nian. Tanba dezde kampaña to’o rezultadu apuramentu laiha kazu insidente ruma ne’ebé mak ita rejista. Ida ne’e hatudu katak ita-nia povu sivilizadu ona, matenek ona, no iha ona maturidade polítika,” nia salienta.
Maibé, Prezidente Munisípiu ne’e lamenta ho tasa partisipasaun eleitór sira-nian iha munisípiu Ermera.
Tuir dadus ofísial fo sai husi STAE munsípiu Ermera hatudu katak eleitór hamutuk 17.228 ka (20.91%) mak la partisipa iha Eleisaun persidensiál, iha loron 19 marsu liubá.
PAM Ermera ne’e husu Parlamentu Nasionál atu kria lei ida hodi fó sansaun ba sidadaun ne’ebé mak la partisipa iha eleisaun, atu nune’e sidadaun sira bele partisipa iha eleisaun tuirmai ho másimu.
Soares husu Ermera oan tomak tau sira-nia diferensa ba kotuk hodi dezenvolve Ermera: “Ita hotu nia hamutuk importante tebes atu lori Ermera ba oin.”
Iha fatin hanesan, Segundu Komandate PNTL munsípiu Ermera, Asistente Superintendente, Eduardo Campos agradese komunidade, eleitór, líder munsípal, líder polítiku, no entidade relevante hotu nia kontribuisaun ba pás no estabilidade durante eleisaun.
Diretór STAE munsípiu Ermera, Eduardo Casimiro de Deus informa rezultadu apuramentu Eleisaun Prezidensiál Périodu 2022-2027 munisípiu Ermera sei aprezenta ba sede apuramentu nasionál iha loron segunda (21/03).
Iha tuku sanolu dader, STAE, CNE, no Fiskais partidu polítiku asina akta apuramentu Eleisaun Prezidensiál Munsipiu Ermera, antes dezloka ba halo aprezentasaun iha sede apuramentu nasionál, iha Dili.
Diretór CNE munsípiu Ermera, Napoleão Vieira Soares hato’o agradese ua’in ba vontade tomak eleitór sira-nian hodi partisipa iha eleisaun.
Tuir rezultadu apuramentu eleisaun prezidensiál iha munisípiu Ermera hatudu katak, kandidatu prezidente José Ramos Horta okupa fatin dahuluk ho totál votu hamutuk 37.600 (59.39%), Francisco Guterres ‘Lú Olo’ okupa fatin da-ruak ho totál votu 9.572 (15.12%), Armanda Berta dos Santos okupa fatin da-tolu ho totál votu hamutuk 4.750 ka (7.50%), Mariano Assanami Sabino Lopes okupa fatin da-ha’at ho votu hamutuk 3.935 ka (6.22%).
Enkuantu, kandidatu Anacleto Bento Ferreira hetan mós votu signifikativu iha munisípiu Ermera ho totál votu 3.170 ka (5.01%), no kandidatu Tito da Costa Cristovão ‘Lere Anan Timur’ hetan votu 1.091 ka (1.72%).
Entertantu, votu husi kandidatu sira seluk iha munisípiu Ermera la to’o rihun ida, hanesan, Martinho Germano da Silva Gusmão hetan votu 863 ka (1.36%), Hermes da Rosa Correia Barros hetan votu 570 ka (0.90%), Felizberto Araújo Duarte hetan votu 372 ka (0.59%), Costancio da Conceição Pinto ‘Terus’ hetan votu 306 ka (0.48%), Rogério Tiago de Fátima Lobato hetan votu 287 ka (0.45%), Isabel da Costa Ferreira hetan votu 243 ka (0.38%), Maria Helena Lopes de Jesus Pires hetan votu 173 ka (0.27%), Virgilio da Silva Guterres ‘Lamukan’ hetan votu 146 ka (0.23%), Antero Benedito da Silva hetan votu 140 ka (0.22%) no Maria Angela Freitas da Silva hetan votu 88 ka (0.14%).
Prosesu apuramentu tomak asisti direta husi fiskais kada kandidatu 16, CNE munisípiu Ermera, brigadista STAE, observadór Uniaun Europeia na’in rua, no hetan apoiu seguransa másimu husi Polísia Nasional Timor-Leste (PNTL).
Notísia relevante:Eleitór hamutuk 17.228 la tuir Eleisaun Prezidensiál iha Ermera
Journalist: Filomeno Martins
Editór: Rafy Belo
