DILI, 21 marsu 2022 (TATOLI)—Primeiru-Ministru (PM), Taur Matan Ruak, segunda ne’e, hakat ba rezidénsia ofisiál Tenente Jenerál reformadu, Tito da Costa Cristovão ‘Lere Anan Timur’ no hasoru malu kuaze minutu 30, hodi komprimenta malu.
“Ha’u mai komprimenta de’it no hato’o parabéns tanba kontribui ba eleisaun ida pasíku tebes, Taur hateten ba jornalista sira, iha Farol.
Notísia relevante: Lere manán ho votu maioria 616 iha suku Caenlio Lautém
Iha biban hanesan, Tenente Jenerál reformadu, Lere Anan Timur, dehan enkontru ne’e nu’udar enkontru entre maun-alin.
“Nia (Taur) mai hasoru ha’u la’ós hanesan Primeiru-Ministru, maibé hanesan ha’u-nia alin Taur mak mai, tanba nia hatene katak ha’u la pasa iha kandaditu Prezidente Repúblika mak nu’udar maun-alin nia mai solidariza no vizita de’it ha’u. Ami-rua la ko’alia buat seluk,” Lere tenik.
Antes ne’e, segunda dadeer ne’e, eis Primeiru-Ministru no atuál Sekretáriu Jerál partidu FRETILIN, Mari Alkatiri, hakat ba rezidénsia Lere.
“Eis Primeiru-Ministru Mari Alkatiri ohin mai, maibé ha’u laiha tempu, ha’u sai tiha ba li’ur,” nia haktuir.
Tuir Lere karik mai tan mak sei hareee atu hasoru malu ho Alkatiri.
“Depois mak ita haree, maibé Mari mai ne’e la’ós kualker, nia Sekretáriu Jerál FRETILIN, ha’u FRETILIN nafatin, la’ós ha’u lakon ne’ebé ha’u la’ós ona FRETILIN, se ha’u la’ós FRETILIN ha’u nega ha’u-nia maluk sira ne’ebé fakar ran,” nia subliña.
Lere Anan Timur hanesan kandidatura Prezidente Repúblika independente ba períodu 2022-2027.
Iha 21 janeiru 2022, Governu liuhosi reuniaun Konsellu Ministru deside prosesu ne’ebé mai hosi desizaun reuniaun Konsellu Superiór Defeza Militár hodi trata pedidu ezonerasaun Tenente Jenerál, Tito da Costa Cristovão Lere Anan Timur hosi kargu Xefe Estadu Maiór Jenerál Forsa Armada, promosaun no nomeasaun Xefe Estadu Maiór Jenerál Forsa Armada.
Nune’e, Prezidente Repúblika, Francisco Guterres Lú Olo, liuhosi dekretu Prezidente Repúblika númeru 4/2022, 28 janeiru, 5/2022 no 6/2022, ezonera Tenente Jenerál Tito da Costa Cristovão Lere Anan Timur hosi kargu Xefe Estadu Maiór Jenerál Lere Anan Timur, promove Majór Jenerál Domingos Raul Falur Rate Laek ba postu Tenente Jenerál no nomea Tenente Jenerál Falur Rate Laek ba kargu Xefe Estadu Maiór Jenerál Forsa Armada.
Tenente Jenerál reformadu, Lere Anan Timur lidera FALINTIL-Forsa Defeza Timor-Leste (F-FDTL) durante tinan-haat, hahú 2015 to’o 2019, hafoin prolonga tan.
Jornalista : Antónia Gusmão
Editora : Julia Chatarina
