DILI, 22 marsu 2022 (TATOLI)—Sekretáriu Jerál Partidu Demokrátiku (PD), António da Conceição ‘Kalohan’, hateten, daudaun ne’e partidu seidauk hakarak deklara posizaun apoiu kandidatura ruma ba Eleisaun Prezidensiál 2022 segunda volta tanba Tribunál Rekursu (TR) seidauk fó sai rezultadu finál.
“Ami seidauk iha desizaun ruma atu apoiu kandidatura ruma hakat ba segunda volta, tanba desizaun Tribunál Rekursu seidauk fó sai rezultadu finál, nune’e bainhira fó sai ona rezultadu katak sei iha segunda volta mak PD foti opsaun atu apoiu ba kandidatu ruma,” Kalohan hateten iha sede PD, Comera, tersa ne’e.
Notísia relevante: Rezultadu provizóriu eleisaun Prezidensial 2022-2027, Ramos Horta kontinua lidera
Bazeia ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi PD ba períodu 2022-2027, ho númeru sorteiu 16, Mariano Sabino Asanami, hetan votu 47.008 (7,57%), ne’ebé hela iha pozisaun lima entre kandidatura 15 seluk.
Maski la adianta atu fó apoiu ba kandidatura ruma iha eleisaun tuir mai, maibé iha tersa lorokraik ne’e, Sekretáriu Jerál PD Kalohan, Vise-Sekretáriu Jerál Nino Pereira ho ekipa, antisipadamente, hasoru malu ho Kandidatu PR, José Ramos Horta, iha Gabinete eis Titulár, Farol.
Bazeia ba atualizasaun ikus hosi STAE ba apuramentu, José Ramos Horta ho votu 301.481 (46,58%), enkuantu Francisco Guterres ‘Lú Olo’ ho votu 143.408 (22,16%), ne’ebé posibilidade kandidatura rua kompete iha eleisaun segunda volta.
Relasiona ho rezultadu ne’ebé fó sai, PD simu tanba rezultadu mai hosi povu, ne’ebé fó ona votu 300.000 resin ba kandidatura Horta.
“Povu nia lian hanesan Maromak nia lian, tanba maioria povu nia lian ona ba Ramos-Horta. Tanba ne’e mak karik iha segunda volta, ami sei respeita povu nia lian ne’e nafatin, tanba ne’e mak opsaun polítika ne’ebé mai halo la’ós halo tanba preferénsia ba kandidatu rua ne’ebé sei kompete ba segunda volta, maibé ami-nia preferénsia ba povu ninia lian,” nia dehan.
Portavós ekipa susesu kandidatura Mariano Sabino Assanami ne’e admite katak hafoin rezultadu fó sai, seidauk simu telefone ofisiál ida hosi kandidatura seluk ne’ebé atu konkorre iha segunda volta.
“Nia (Asanami) no ha’u hanesan portavós to’o agora seidauk simu telefone ka kontaktu ruma hosi kandidatura balun, maibé hanesan mós Prezidente partisu ninia lian, ha’u respeita maioria votu, ne’e hanesan pozisaun PD,” nia tenik.
Iha biban ne’e, Sekretáriu Jerál lori PD nia naran hato’o agradese ba partisipasaun Kandidatu PR hotu iha Eleisaun Prezidensiál 2022.
“Ami nafatin iha kompromisu ida atu haburas demokrasia iha Timor-Leste, tanba ida-ne’e hanesan orgullu ida ba PD, maski kuaze tama rezultadu finál kandidatura Mariano Sabino Assanami hela iha pozisaun entre haat no lima, maibé ami nafatin hanoin katak ida-ne’e pozisaun ne’ebé povu deside,” nia tenik.
Tanba ne’e, atuál Prezidente PD, Mariano Sabino Assanami, nafatin simu rezultadu ne’ebé mak iha hodi nafatin fó nia kompromisu hanesan ema ne’ebé lidera hela partidu ida no nafatin ezerse nia papél atu dinamiza polítika iha Parlamentu Nasionál hanesan deputadu.
Aleinde ne’e, Assanami mós apresia ho votu ne’ebé hetan, nune’e bele nafatin fó konfiansa hala’o nia knaar liuliu atu kontribui ba dezenvolvimentu rai-laran.
Jornalista : Arminda Fonseca
Editora : Julia Chatarina
