iklan

NASIONÁL, DILI, ELEISAUN, HEADLINE

Apuramentu nivel nasionál kona-ba rezultadu ELPREZ foin konklui Aileu

Apuramentu nivel nasionál kona-ba rezultadu ELPREZ foin konklui Aileu

Prezidente Komisaun Nasionál Eleisaun (CNE, sigla portugés), José Agostinho da Costa Belo. Imajen Tatoli/Francisco Sony.

DILI, 22 marsu 2022 (TATOLI) – Prezidente Komisaun Nasionál Eleisaun (CNE-sigla portugés) José Agostinho da Costa Belo, hateten prosesu apuramentu akta eleisaun prezidensiál nivel nasionál ba loron dahuluk, 22 marsu 2022 foin maka konklui husi Munisípiu Aileu nian.

Prosesu kontajen votu nivel nasionál no diaspora hahú kedas iha loron 19 fulan- marsu ne’e, husi tempu ne’ebá rekollamentu dadus husi munisípiu hodi prosesa no halo  submisaun ba CNE foin remata ona iha loron 21 fulan-marsu 2022.

Notísia Relevante :CNE planea submete karta estensaun loron apuramentu ba TR

“CNE sei foka liu atu halo ezaminasaun ba votu nulu no reklamadu hodi halo ezaminsaun no foti konsiderasaun ba intensaun votante sira atu sai votu válidu,” José Agostinho da Costa Belo, ba Tatoli iha edifísiu CNE, tersa kalan.

Prosesu apuramentu akta nivel nasionál ne’e atu verifika didiak kona-ba votu nulu sira atu sai válidu ka lae nune’e votante sira labele lakon sira-nia diretu vota ne’ebé sira ezerse ona iha loron eleisaun prezidensiál foinlalais.

“Hafoin simu tiha relatóriu sira nee, CNE nia devér mak atu halo verifikasaun no observasaun ba informasaun sira tomak mak kontein iha relatóriu sira ne’e atu hodi hare sira-nia akurasia, kompletu eh lae, diskrepansias no legalidade. Nee halo tuir eleisaun ida-idak ninian,” Nia dehan.

Prosesu apuramentu akta nivel nasionál ne’e hodi ezamina ba votu balun ne’ebé votante sira vota ho maneira asinatura, marka dupla no seluk tan. Nune’e CNE bele konsidera votu reklamadu sira bele válidu fali.

CNE identifika ona totál votu nulu hamutuk 526 husi munisípiu 12 inklui mós Rejiaun Administrativa Espesiál Oé-Cusse Ambeno (RAEOA).

Ba futuru, Prezidente CNE ne’e dehan persiza reforsa edukasaun sivika ba votante sira nune’e bele iha koñesimentu kle’an atu hili sira-ninia kandidatura tuir bulletin votu ne’ebé iha.

Prosesu apuramentu akta nivel nasionál durante oras 72, hahú iha loron 22 to’o 24 fulan-marsu 2022 molok CNE anunsia rezultadu eleisaun provizóriu hodi admite atu kandidatu Prezidente Repúblika sirabele halo reklamasaun antes submete ikus ba Tribunál Rekursu.

Tuir kalendariu eleisaun, iha loron 24 fulan-marsu CNE ofisialmente sei anunsia rezultadu provizoriamente ba públiku. Maibe bainhira durante oras 72 ne’e mak la konsege finaliza, CNE sei manda karta estensaun ba Tribunál Rekursu hodi aprova loron estensaun hodi finaliza prosesu apuramentu akta nivel nasionál.

Jornalista:José Belarmino de Sá

Editór :Agapito dos Santos

iklan
iklan

Leave a Reply

iklan
error: Content is protected !!