DILI, 22 marsu 2022 (TATOLI)-Komisaun Nasionál Eleisaun (CNE-sigla portugés) planea sei haruka karta estensaun ba Tribunál Rekursu hodi estende loron apuramentu nivél nasionál bainhira la konsege halo verifikasaun ba akta hotu-hotu iha nivél nasionál tuir kalendariu eleisaun ne’ebé determina ona antes ne’e.
Prezidente CNE, José Agostinho da Costa Belo, relata prosesu apuramentu nasionál iha loron dahuluk ne’ebé hahú iha 22 fulan-marsu 2022 ne’e, ekipa CNE foin finaliza verifikasaun akta husi munisípiu Aileu.
“Munisipiu Ainaro foin metade no seidauk finaliza. Hare ba kondisaun fíziku fiskais sira, deside atu para lai to’o iha tuku 2:00 madrugada de’it,” nia dehan ba Tatoli iha edifísiu CNE, tersa kalan ne’e.
Prosesu apuramentu nivel nasionál la’o neineik tanba tenke halo verifikasaun kona-ba votu nulu sira. Maibé ekipa CNE ho esforsu tomak hodi hala’o servisu ne’e atu la’o ho di’ak.
Tuir nia durante prosesu verifikasaun ne’e, CNE identifika ona totál votu nulu hamutuk 526 husi munisípiu 12 inklui mós Rejiaun Administrativa Espesiál Oé-Cusse Ambeno (RAEOA).
“Sekarik mak la konsege finaliza durante oras 72 mak CNE bele submete karta ba Tribunál Rekursu atu bele autoriza ba estensaun hodi bele finaliza verifikasaun akta ba apuramentu nasionál,” Prezidente CNE ne’e hateten.
Tuir kalendariu eleisaun prosesu apuramentu nivel nasionál hahú iha loron 22 fulan-marsu to’o 24 fulan-marsu 2022. Maibé prosesu verifikasaun dadus kona-ba apuramentu akta nivel nasionál sei falta loron rua, tanba ne’e espera bele finaliza tuir ninia kalendariu.
Tuir observasaun Agência Tatoli iha terrenu identifika katak atividade kona-ba prosesu verifikasaun apuramentu akta iha loron dahuluk 22 marsu 2022, hahú iha tuku 2:00 loraik no taka iha tuku 02:00 Otl, loron 23 marsu 2022.
Jornalista:José Belarmino de Sá
Editór : Agapito dos Santos
