Governu apoia rekursu materiál no insentivu finanseiru ba líder komunitáriu
DILI, 23 marsu 2022 (TATOLI)-–Governu liuhosi reuniaun Konsellu Ministru (KM) aprova Projetu Dekretu-Lei, aprezenta hosi Ministru Administrasaun Estatál, Miguel Pereira de Carvalho, ne’ebé refere ba aprovasaun ba alterasaun daruak Dekretu-Lei númeru 6/2014, loron 26 fevereiru, kona-ba rekursu materiál no insentivu finanseiru ba líder komunitáriu sira.
“Haree ba karater naruk no ezijente hosi kolaborasaun entre organizasaun komunitáriu no Estadu, hosi kuadru normativu foun ne’ebé introdús hosi Lei Suku sira no prosesu deskonsentrasaun administrativa a-favór ba suku sira, hakarak ho diploma ida-ne’e prosede ba atualizasaun rekursu materiál sira no insentivu finanseiru sira hodi atribui ba organizasaun komunitáriu sira,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.
Notísia relevante: Governu Hahú Estabelese Estrutura Munisipál Hodi Dudu Prosesu Desentralizasaun
Dekretu-Lei ne’e hakarak reforsa prinsípiu legalidade, transparénsia no administrasaun di’ak hosi rekursu finanseiru Estadu, ne’ebé importa ba área normativa dekretu-lei ne’e, definisaun no kuantifikasaun konjuntu hosi rekursu no insentivu finanseiru sira atu atribui ba líder no organizasaun komunitária sira, ne’ebé remete de’it ba diploma ministeriál konjuntu ba regra sira kona-ba prosedimentu utilizasaun insentivu finanseiru.
“Subsídiu fiksu ba Xefe suku sira hosi $140 ba $250, subsídiu fiksu sira ba Xefe aldeia sira hosi $100 ba $150. Valór hosi subsídiu operasionál ba kontratasaun hodi ausiliár apoiu administrasaun suku sai hosi $115 ba $140 ho valór kada fulan, korresponde ba fulan 10, subsídiu dezlokasaun ba membru Konsellu suku hosi $30 ba $40, maibé valór seluk laiha alterasaun,” nia esplika.
Jornalista : Antónia Gusmão
Editora : Julia Chatarina
