DILI, 23 marsu 2021 (TATOLI)—Governu liuhosi reuniaun Konsellu Ministru (KM), kuarta ne’e, aprova ona Projetu Proposta Rezolusaun ba Parlamentu Nasionál, ne’ebé aprezenta hosi Ministra Negósiu Estranjeiru no Kooperasaun, Adaljiza Albertina Xavier Reis Magno, ba aprovasaun Akordu Servisu Aéreu sira entre Repúblika Demokrátika Timor-Leste no Emiradu Árabe Unidu.
“Ho akordu ida-ne’e, enkonformidade no komplementár ba Konvensaun Aviasaun Sivil Internasionál, hakarak estabelese no opera servisu aéreu sira entre nasaun rua no ho nasaun sira seluk,” Ministru Prezidénsia konsellu ministru, Fidelis Manuel Leite Magalhães, informa hafoin reuniaun ezekutivu iha Palásiu Governu kuarta ne’e.
Notísia relevante: Akordu Aéreu ho Austrália, Ministra Adaljiza: “ Timor-Leste Nakloke-an ba Empreza Aéreu”
Nune’e, hafoin aprovasaun hosi parte ezekutivu sei haruka ba Parlamentu Nasionál hodi hetan ratifikasaun.
Antes ne’e, Governu Timor-Leste estabelese ona akordu servisu aéreu ho Governu Austrália, ne’ebé nu’udar meiu ida atu loke-an ba empreza transporte aéreu sira atu mai halo operasaun iha Timor-Leste.
Jornalista : Antónia Gusmão
Editora : Julia Chatarina
