Lia-na’in Pante Makasar aprezenta kultura orijinál, habelar identidade Oé-Cusse ba jerasaun foun
OÉ-CUSSE, 24 marsu 2022 (TATOLI)- Lia-na’in sira hosi suku ualu (8) perténsia ba sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), kinta ne’e aprezenta kultura orijinál iha kampaña nasionál ‘Kultura Forte Nasaun Metin’ hodi habelar identidade kultura orijinál Oé-Cusse nian ba jerasaun foun.
Kampaña nasionál ne’e realiza hosi Sekretaria Estadu Arte no Kultura (SEAK), ho tema ‘Kultura Forte Nasaun Metin’, atu hametin kultura iha Rejiaun Administrativa Espesiál Oé-Cusse Ambeno (RAEOA).
Tópiku ne’ebé aprezenta iha kolókiu ne’e, bazea ba istória Oé-Cusse no lenda orijinál komunidade Pante Makasar, lian Baiqueno iha Oé-Cusse inklui lisan no lulik orijinál kada uma lisan kada suku.
“Suku ualu iha Pante Makasar mai aprezenta ona kultura orijinál kada suku idak-idak ho nia identidade, objetivu atu haburas no dezenvolve kultura identidade Oé-Cusse nian, nune’e prezensa lia-na’in sira importante atubele fahe ba jerasaun foun sira, atu labele halakon iha futuru,” Diretór Nasionál SEAK, João Fátima da Cruz, informa ba Agência Tatoli iha salaun Igreja Numbei, Oé-Cusse.
Nia informa, rezultadu aprezentasaun ne’e, parte SEAK sei akumula hotu istória kada suku lori ba nasionál, hodi aprezenta iha ministériu hanesan referénsia, nune’e iha futuru jerasaun foun bele uza.
“Ohin iha sujestaun no rekomendasaun presiza akumula hotu lia-na’in sira-nia hanoin depois ita halo fali avaliasaun ba programa ne’e, mais normalmente ami foti ona munisípiu tolu, komesa iha Liquiçá, Covalina no RAEOA, ne’ebé sei hala’o ba munisípiu hotu nia rezultadu distribui ba eskola sira atu aprende ita-nia kultura rai ne’e nian,” nia katak.
Tuir nia, loloos programa ne’e kobre hotu sub-rejiaun Oésilo, Pássabe no Nítibe maibé tanba kestaun tékniku orsamentu nian ne’ebé deside adia ba tempu seluk, entaun SEAK realiza de’it iha Pante Makasar, tanba Oé-Cusse mak sai alvu ba tinan nee’e.
Iha sesaun aprezentasaun ne’e, Adjunta Prezidente Autoridade RAEOA, Leonia Monteiro, agradese ba ekipa hosi SEAK, tanba realiza kampaña nasionál ne’e hodi kaer metin nafatin kultura identidade Oé-Cusse nian.
“Autoridade agradese, tanba ne’e programa di’ak, durante ne’e RAEOA hala’o ona kultura ida ne’e, maibé foka ba empoderamentu ekonomia ba feto rurál atu promove kultura tais Oé-Cusse nian ho eskala rejionál, nasionál no internasionál, tán ne’e mak funsionáriu RAEOA iha obrigasaun atu uza iha servisu fatin hodi valoriza kultura atoni Oé-Cusse nian,” nia orgullu.
Entretantu, suku ualu (8) iha perténsia sub-rejiaun Pante Makasar mak hanesan, suku Costa, Lifau, Nipani, Cunha, Lalisuk, Naimeco no Bobokase.
Notisia relevante: SEAK realiza kampaña nasionál “Kultura Forte Nasaun Metin” iha Oé-Cusse
Jornalista : Abílio Elo Nini
Editór : Evaristo Soares Martins
