DILI, 24 marsu 2022 (TATOLI)–Ministériu Edukasaun Juventude no Desportu (MEJD) sei introdús kaderneta eskolár foun ba edukasaun nível ensinu báziku, iha tempu besik.
“Ministériu halo ona renovasaun kaderneta sira no tempu badak bele aprova ona. Tanba mosu reklamasaun no keixa barak dehan kaderneta eskolár tuan ne’e mahar liu,” Ministru Edukasaun Juventude no Desportu, Armindo Maia, informa iha edifísiu MEJD, Villa verde, kinta ne’e.
Notísia relevante: MEJD sei distribui kaderneta eskolár ba estudante 16.000-resin
Iha sorin seluk, Diretór Jerál Edukasaun Ensinu MEJD, Luís Manuel Fernandes, rekoñese katak kaderneta eskolár ba edukasaun nível ensinu báziku siklu 1,2,3 iha problema duni tanba halo separasaun ba estudante iha edukasaun báziku.
“Bele imajina estudante ida molok ramata edukasaun báziku de’it iha kedan kaderneta eskolár tolu. Tanba ne’e maka kaderneta eskolár ba ensinu báziku siklu 1,2,3 sei halo sai ida de’it, nune’e labele separa tan,” nia dehan.
Nia prefere kaderneta halo ida de’it hodi labele prejudika ba buat seluk no bele simplifika.
“Ema ida de’it iha ensinu báziku ne’e konserteza sei liu hitu hotu siklu tolu ne’e,” nia tenik.
Jornalista : Tomé Amado
Editora : Julia Chatarina
