DILI, 24 marsu 2022 (TATOLI)—Sekretaria Estadu Ambiente (SEA) liuhosi Sentru Edukasaun no Informasaun Ambientál, kinta ne’e, realiza atividade estudu komparativu ba programa ‘Eskola Matak’, hamutuk ho responsável eskola ne’ebé implementa programa ne’e.
“Ita hatene katak programa Eskola Matak hahú implementa iha tinan 2016, entaun ohin ita konvida fali sira mai atu hatene programa nia kontinuasaun, tanba bainhira ita ko’alia kona-ba sustentabilidade, tenke kria meiu hodi envolve eskola sira ne’ebé implementa ona, nune’e sira fahe informasaun hodi sai referénsia ba iha eskola sira seluk,” Diretora Edukasaun Informasaun Ambiente hosi SEA, Amenica Machado Fernandes, hateten iha salaun SEA, Akait.
Notísia relevante: EBC Esperansa da Pátria Modelu ba Programa Eskola Verde iha Timor-Leste
Desde implementasaun programa, SEA envolve eskola hanesan Ensinu Bázika Sentrál (EBC, sigla portugés) Esperança da Pátria Dili, Eskola Katólika Santo António Manatuto, EBC Fatuku Same, Eskola Dom Martinho Maliana, EBC Salele Covalima, no EBC Casait Liquiçá.
“Ita envolve Diretór no Koordenadór eskola sira tanba ita hetene eskola verde ne’e atu la’o di’ak ka ladi’ak depende filafali ba estrutura eskola, tanba parte ambiente nian fó de’it informasaun kontinuasaun, maibé sira mak kontinua,” nia akresenta.
Aleinde ne’e, parte eskola iha kompromisu hakarak integra valór ambiente ne’e ba iha sira-nia atividade tomak, tantu kurikulár no ekstra kurikulár.
“Papél hosi SEA mak fó formasaun kona-ba programa Eskola Matak no oferese ai-oan jardín ba eskola sira, maibé filafali ba eskola ne’e nia vontade implementa. Bainhira eskola ida laiha vontade atu implementa entaun sustentabilidade ne’e araska, maibé realidade buat ne’ebé SEA haree, durante ne’e eskola ne’ebé implementa programa ne’e kuaze iha progresu hotu,” nia tenik.
Nota mós katak, rezultadu balun ne’ebé hatudu mak hanesan Eskola EBC Esperança da Pátria daudaun ne’e nakonu ho ai-oan.
Nune’e, tinan ne’e SEA planeia implementa tan programa ne’e ba eskola tolu iha munisípiu Lautém, Baucau no Viqueque.
Iha fatin hanesan, Diretór Eskola EBC, Esperança da Pátria, João da Silva Pereira, rekoñese, programa ne’e lori mudansa ba eskola tanba nakonu ho ai-horis halo jardín sai matak liután.
“Antes seidauk implementa programa, rai maran loos no eskola ne’e ema risku arbiru de’it, maibé hafoin implemeta programa ne’e agora eskola sai matak no moos, halo estudante sira tama eskola ho kontente,” nia dehan.
Nune’e, meiu ne’ebé durante ne’e eskola Esperança da Pátria uza to’o agora eskola sai matak mak hanesan, iha eskola hahú hosi Diretór eskola to’o estudante sira tenke envolve hotu iha programa, nune’e bele hatudu rezultadu di’ak.
Aleinde ne’e, difikuldade ne’ebé eskola ne’e hasoru hafoin implementa programa Eskola Matak mak hanesan bee laiha atu rega ai-oan sira ne’ebé kuda ona, entaun eskola deside fura rasik bee hodi rega ai-oan sira.
“Eskola hetan impaktu pozitu hosi programa ne’e no agora kada tinan estudante barak mak hakarak tama eskola Esperança da Pátria to’o fatin mak atu la to’o,” Diretór eskola dehan.
Estudante ne’ebé daudaun eskola iha EBC Esperança da Pátria hamutuk 1.675.
Jornalista : Arminda Fonseca
Editora : Julia Chatarina
