DILI, 25 marsu 2022 (TATOLI)–Diretór Nasionál Infraestrutura Eskolár (DNIE), Hélio Lopes, sujere ba Ministériu Obra Públika (MOP) atu harii morru protesaun hodi satán mota besik Eskola Ensinu Sekundáriu Tékniku Vokasionál (ESTV) Hera no komunidade nia uma.
“Durante ne’e, Ministériu Edukasaun Juventude no Desportu (MEJD) no MOP sempre pasa informasaun ba malu hodi garante serbisu iha terrenu, hanesan normaliza mota iha Hera, maibé sira normaliza de’it, atu garante kondisaun mota ne’e ba tempu naruk laiha, di’ak liu MOP halo morru protesaun ba mota ne’e hodi asegura eskola inklui komunidade tomak iha área ne’ebá, ida-ne’e maka sira-nia responsabilidade,” Diretór hateten ba Agência TATOLI, via telefónika, sesta ne’e.
Notísia relevante: MEJD seidauk halo intervensaun ba Eskola Tékniku Vokasionál Hera
Diretór mós nota katak, kondisaun mota Hera hatudu ona situasaun perigu, tanba ne’e bainhira la halo intervensaun imediata, la’ós fó ameasa de’it ba eskola maibé ba komunidade tomak ne’ebé besik iha área ne’e.
Tuir Hélio Lopes, Institutu Jestaun Ekipamentu, Institutu Públiku (IGE, sigla portugés), antes ne’e normaliza ona, hamoos no suru rai-henek sira iha mota, maibé la konsege dura to’o tempu naruk tanba mota mai sobu filafali.
Kona-ba kadeira no meza atu apoiu ba eskola sira, tuir Ministru antes ne’e parte ministériu apoiu ona kadeira no meza hamutuk 20.000 no daudaun iha planu tempu badak atu sosa tan meza no kadeira 5.000.
Antes ne’e, iha segunda (21/02), akontese udan boot no inundasaun, ne’ebé mota tun ho volume maka’as konsege sobu sala aula ida ho hariis fatin Eskola ESTV Hera, tanba ne’e iha momentu ne’ebé kedan Dirijente ESTV Hera hola inisiativa rasik suspende atividade aprendizajen estudante 175 tanba eskola tama iha kondisaun risku dezastre naturál.
Enkuantu, kondisaun sala aula hosi Departamentu Komérsiu daudaun ne’e la uza totál, hela de’it Departamentu Kontabilidade maka sei uza maibé ninia kondisaun espasu mós falta de’it 40cm to’o 50cm para mota sobu ona tatis eskola nian.
Iha sorin seluk, Ministru Edukasaun Juventude no Desportu, Armindo Maia, hateten, parte ministériu hein MOP ninia intervensaun ba mota, nune’e bele haree hadi’a infraestrutura eskola, tanba semana hirak ona mak atividade konstrusaun paradu.
“Ami tenke haree didi’ak lai maka kontinua fali obra ne’e tanba ministériu lakohi foti risku. Maibé kona-ba tanke bee-moos nian ha’u hanoin laiha problema,” nia akresenta.
Tuir Ministru, kestaun boot mak kondisaun iha eskola kotuk, ne’ebé distánsia mota ho eskola laiha ona espasu.
Nune’e mós, Diretór eskola ESTV Hera, Francisco da Costa Fernandes, haktuir, katak antes ne’e United Nations Children’s Fund (UNICEF) hakarak apoiu toilet provizóriu, maibé parte ministériu no eskola la aseita tanba fasilidade ne’e bele prejudika ema no ambiente eskola la seguru hodi instala fasilidade ne’e.
“Ita hatene ona toilet provizóriu ne’e prejudika liu ita tanba loron-loron tenke hasai fo’er ba soe no bee laiha tan. Depois toilet ne’e mós plástiku, labarik nakar ida mai baku rahun tiha, bele hamosu tan todan ida ba ita. Tanba ne’e maka ami la aseita,” nia dehan.
Maski nune’e, eskola deside prosesu aula prezensiál ba estudante sira kontinua la’o, maibé la tuir ona oras normál, atividade semana sim semana não ho oras rua ho balun de’it, hahú tuku 08:00 to’o tuku 10:30 no parte lorokraik laiha atividade.
Totál estudante ESTV Hera hamutuk 175, kompostu hosi departamentu komérsiu 10o ano iha 26, 11o ano iha 18 no 12 o ano iha 23, ba kursu akontablidade iha 39, 11o iha 37 no 12o ano iha 32.
Jornalista : Tomé Amado
Editora : Julia Chatarina
