DILI, 25 marsu 2022 (TATOLI)—Kámara Komérsiu Indústria Timor-Leste (CCI-TL, sigla portugés) nota katak durante ne’e folin nesesidade bázika sa’e iha merkadu nasionál, tanba ne’e husu autoridade kompetente presiza tau-atensaun ba servisu portuáriu.
Tuir Prezidente CCI-TL, Oscar Lima, folin sasán nesesidade bázika sa’e, la’ós tanba empreza sira hakarak hasa’e maibé tanba hosi fábrika rasik mak hasa’e tanba impaktu hosi COVID-19 inklui funu Rúsia no Ukraina, nune’e emprezáriu sira sosa mai aumenta folin oituan.
“Impaktu seluk mak kontetór ne’ebé tula sasán mai demora iha portu, tanba portu loke segunda to’o sesta de’it, entaun kompañia hatama ona sasán demora iha portu sira selu taxa, entaun ida-ne’e mós afeta ba sasán no automátikamente folin sa’e, nune’e Governu tenke tau-atensaun mós iha atividade portu,” Oscar Lima hateten iha salaun CCI-TL, Acait, sesta ne’e.
Notísia relevante: Alfándega komprometidu hadi’a sistema atendimentu ba sasán importadu risku maka’as
Tanba ne’e, emprezáriu timor-oan ne’e husu Governu tau-atensaun ba servisu portuáriu, hodi bele loke hosi segunda to’o domingu.
“Inflasaun ne’e mosu tanba haree filafali ba kontentór sira ne’ebé tama mai Timor-Leste ho folin karun tebes, tanba derivadu agora só ró ida de’it mak halo movimentu mai, entaun ohin ita bolu grosista iha Timor-Leste hanesan empreza boot sira ne’ebé hatama sasán no fa’an fali iha ita-nia rai, ami ko’alia no diskute prinsipalmente hanoin kona-ba inflasaun ba ita-nia rai ne’e oinsá hamutuk ho Governu atu buka solusaun,” nia dehan.
Nune’e, CCI-TL iha tempu badak nia-laran sei tuur hamutuk ho Governu liuhosi Ministériu Turizmu Komérsiu no Indústria (MTKI) no Ministériu Koordenadór Asuntu Ekonómiku (MKAE) atu buka solusaun ba problema ne’e.
“Ita ko’alia kona-ba nesesidade bazika ba ita-nia rai ne’e importante tebes,” nia akresenta.
Jornalista : Arminda Fonseca
Editora : Julia Chatarina
