COVALIMA, 25 marsu 2022 (TATOLI)—Inspetór Unidade Seketáriu Estadu Juventude no Desportu (SEJD), Saturnino Sarmento, hateten SEJD entrega pesoál unidade servisu hamutuk ema na’in-ualu (8) ba autoridade munisípiu Covalima destaka iha postu administrativu sira atu identifika joven sira-nia kreatividade.
“Ohin ami to’o iha ne’e, molok ami to’o iha ne’e haruka ona karta ba administradór hotu, ami esplika servisu liña ministeriál atu reforsa programa juventude no desportu iha área juventude no desportu,” Inspetór Unidade Seketáriu Estadu Juventude no Desportu (SEJD), Saturnino Sarmento, hato’o ba jornalista sira hafoin entrega pesoál sira-ne’e ba Adminsitradór Munisípiu Covalima iha salaun administrasaun munisípiu Covalima, sesta ne’e.
Bazea ba programa hosi Seketáriu Estadu Juventude no Desportu (SEJD) aprezenta pesoál na’in-ualu (8) ba autoridade munisípiu Covalima hodi hala’o servisu iha postu administrativu Fatumea foin na’in-ida falta na’in-ida, Zumalai na’in-ida falta na’in-ida, Tilomar na’in-rua, Fatululik na’in-rua, Maucatar na’in-rua no iha postu administrativu Fohorem seidauk iha.
Bazea ba planu no programa tinan 2022 hosi SEJD nian, sira na’in-ualu (8) ne’ebé destaka iha postu administrativu sira-ne’e atu implementa progama sira hanesan área juventude no despostu nian.
Iha área desportu, implementa programa haree iha área despostu eskolar, kompetisaun futebol Juvenil nivel munisípiu, jogu komunitária, formasaun arbitu no treinadór no unidade servisu.
Iha área juventude nian, sei implmenta programa fó formasaun, internet saudavel, fundasaun dezenvolvimentu softwere livre, SEJD nia programa lori joven sira partisipa formasaun óspitalidade, hakbiit joven kuidadu meiu ambiente no membru parlamentu foinsa’e.
Nune’e mós, minimiza risku fuma tabaku, SEJD fornese apoiu operasionál hanesan ho sentru juventu Covalima hodi realiza formasaun regulár ba joven sira, SEJD sei disponibiliza orsamentu hosi selebra loron nasionál juventude, tinan ne’e joven hosi munisípiu Covalima sei partisipa ICT iha munisípiu Manatuto.
Reprezentante Administradór Munisipiu Covalima, Jacinto dos Santos, apresia ba Sekretáriu Estadu Juventude no Desportu (SEJD) hodi implementa programa foku ba iha postu administrativu sira.
“Ha’u apresia no orgullu ba programa hosi Sekretáriu Estadu Juventude no Desportu rekruta ona pesoál no destaka ema na’in-rua (2) ba iha postu administrativu sira hala’o servisu tenke ho responsabilidade,” nia hateten.
Jornalista : Celestina Teles
Editór : Cancio Ximenes.
