DILI, 25 marsu 2022 (TATOLI)–Vigariu Episkopál Asuntu Sosiál, Padre Emanuel Lelo Talok, hateten uma kreda lamenta ho inan sira-ne’ebé kontinua so’e bebé tanba asaun ida-ne’e konsidera krime tanba bebé ne’e sala laek.
Notísia Relevante: PRADET Baucau asegura ona bebé ne’ebé soe iha Sagadate
“Igreja nu’udar inan ida ba ita hotu-hotu ne’e lamenta tebes bainhira iha asaun s’e bebé, tanba ne’e krime liliu kontra labarik tanba bebé ne’e sala laek no rua labarik ne’e labele defende an,” Padre Emanuel Lelo Talok, hateten ba Ajénsia Tatoli hafoin ordenasaun ba diákonu na’in-rua no frater na’in-ida, iha Igreja Katedrál Dili, sesta ne’e.
Tuir bibi atan ne’e katak, labarik sira labele defende an tanba labarik sira sei fraku no ema halo violénsia to’o oho nia mós nia labele defende an, tanba ne’e uma kreda lamenta no haree katak ne’e krime sériu.
“Nune’e, uma kreda konvida atu ema hot-hotu respeita moris ho pró-life, ne’e katak suporta moris ka suporta vida. Tanba ne’e, uma kreda sempre bolu ema hotu-hotu katak ita ne’e nu’udar imájen Maromak Nian. Ho ida-ne’e ita tenke kuidadu didi’ak, tanba ita halakon bebé nia moris ne’e ita halakon Maromak nia moris,” nia dehan.
Tanba ne’e, nia husu ba sarani sira bainhira iha oan la presiza atu soe, maibé bele komunika ho ema ne’ebé bele suporta atu kuidadu bebé ne’e moris tanba labarik mos iha direitu atu moris.
“Bainhira ita iha oan, karik la prontu ita lalika tauk no mo’e, maibé ita komunika ho ema ne’ebé bele suporta ita atu kuida didi’ak oan sira-ne’e hodi hahoris no haree ho di’ak,” bibi atan ne’e apela.
Entretantu, iha loron 21 marsu tinan ne’e inan deskoñesidu ida soe bebé mane ida iha suku Sagadate, postu administrativu Laga, Munisípiu Baucau ne’ebé daudaun ne’e bebé refere kondisaun di’ak no asegura ona iha Psychosocial Recovery and Development ina East Timor (PRADET) Baucau.
Jornalista : Nelia Fernandes
Editór : Cancio Ximenes
