DILI, 27 marsu 2022 (TATOLI)–Sekretáriu Jerál Partidu Frente Revolusionária do Timor-Leste Independente (FRETILIN), Marí Alkatiri, hateten, nia parte hasoru malu ona ho Tanente Jenerál Reformadu, Lere Anan Timur.
“Ami na’in-rua Jenerál Lere Anan Timur hasoru malu ona, nia mak dehan duni mai ha’u, nia hanesan alin mai buka ha’u-nia maun, ho nune’e ami na’in-rua hasoru malu ona no ko’alia oinsá atu haree ba oin,” Alkatiri hateten ba jornalista sira, iha salaun Canossa Has-laran, Manleuana, domingu ne’e.
Admite katak iha duni dezentendimentu entre nia ho Lere Anan Timur durante diskursu públiku iha kampaña maibé ikus mai rezolve hotu ona.
“Dezentendimentu oituan ne’ebé ha’u ho Jenerál Lere ko’alia loos ona no rezolve ona, agora atu haree de’it ida-ne’e ba oin atu halo saida. Ami na’in-rua hasoru malu iha sesta (25/03),” nia akresenta.
Notísia relevante: Lere sei foti dezisaun apoiu Horta-Lú Olo tuir povu nia interese
Sekretáriu Jerál partidu istóriku ne’e haktuir, durante ne’e militante FRETILIN balun mak apoiu Lere iha eleisaun primeira volta.
“Apoiante Lere nian iha eleisaun foin lalais ne’e la’ós ema FRETILIN hotu, kuaze 95% nune’e mak FRETILIN, maibé Lere la hanesan kandidatura ona, entaun Jenerál Lere rasik ho militante sira fila hotu mai apoiu ba Lú Olo,” Alkatiri tenik.
Notísia relevante: Taur komprimenta Lere iha rezidénsia Farol
Iha sorin seluk, Sekretáriu Jerál hamutuk ho estrutura hakarak simu Jenerál Lere iha Komité Sentral FRETILIN (CCF, sigla portugés) la’ós hanesan militante baibain hodi fó de’it kartaun.
“Ha’u dehan ona hori uluk atu simu Lere iha CCF ne’e ho dignidade, la’ós simu hanesan militante baibain hodi fó kartaun de’it. Ho dignidade tenke rekoñese nia istória tomak desde 1974-1975 mai to’o ohin loron ne’e mak ha’u dehan simu ho dignidade, maibé ema balun hanoin simu hanesan miltante baibain, maibé ema istóriku nune’e tenke simu ho dignidade,” Alkatiri dehan.
Jornalista : Hortencio Sanchez
Editora : Julia Chatarina
