DILI, 28 marsu 2022 (TATOLI)— Komisaun Nasionál ba Eleisaun (CNE, sigla portugés), segunda ne’e, iha tuku 18:00 otl, submete ona rezultadu apuramentu nasionál eleisaun Prezidensiál períodu 2022 too 2027 ba Tribunál Rekursu (TR) atu halo apresiasaun no halo valida rezultadu finál.
Durante oras 72, Komisaun Nasionál Eleisaun realiza apuramentu nasionál hodi konfere akta rezultadu apuramentu hosi sentru votasaun 1.200, verifika votu nulu no reklamadu sira, ne’ebé haktuir ba Lei Eleitorál ba Prezidente Repúblika nú.15/2021
Tuir lei eleisaun prezidensiál atribui ba Tribunál Rekursu ne’ebé ezerse kompeténsia Supremu Tribunál ba Justisa hodi apresia no valida desizaun ba akta apuramentu nasionál eleisaun prezidensiál ne’ebé realiza ona iha 19 marsu.
Rezultadu final apuramentu nasionál ne’e entrega direta hosi Prezidente CNE, José Agostinho Belo, ne’ebé akompaña hosi komisáriu CNE nain-lima.
Iha intervista, Prezidente CNE, José Agostinho Belo, hateten CNE nia parte konklui ona prosesu apuramentu nasionál no rezultadu eleisaun Prezidensiál 2022 too 2027, nune’e remete ba Tribunál atu pronunsia rezultadu.
“Rezultadu provizóriu fó sai iha tempu legál durante oras 24 too mai ohin ne’ebé laiha kontestasaun no reklamasaun, nune’e CNE remete ba Tribunál Rekursu,” Prezidente CNE ne’e hateten ba Jornalista sira iha edefísiu Tribunál Rekursu-Caicoli.
Tribunál Rekursu iha oras 72 atu haree nune’e halo validasaun no pronunsia rezultadu finál eleisaun Prezidensiál nian.
“Desizaun segunda volta ou lae ne’e ami lahatene tanba ne’e desizaun Tribunál Rekursu nian,” nia akresenta.
Iha apuramentu nasional, CNE simu votu nulu hamutuk 12.706, votu reklamadu 437, ho totál iha votu nulu hamutuk 13.143, hafoin halo verifikasaun durante prosesu apuramentu, CNE deside sai nulu 8.386, sai rejeitadu 5, branku 67 no sai válidu hamutuk 4.687.
Iha publikasaun rezultadu finál provizóriu ne’e, partisipa hosi reprezentante kandidatura na’in-16, Observadór nasionál no internasionál.
Hosi rezultadu ne’e kandidatura José Ramos Horta hetan votu hamutuk 303.477 (46,6%), Francisco Guterres ‘Lú Olo’ 144.282 (22,1%), Armanda Berta dos Santos 56.690 (8,7%), Tito da Costa Cristóvão Lere Anan Timur 49.314 (7,6%), Mariano Assanami Lopes Sabino 47.334 (7,3%), Anacleto Bento 13.205 (2,0%).
Martinho Germano da Silva Gusmão 8.598 (1,3%), Hermes da Rosa Correia Barros 8.030 (1,2%), Maria Helena Lopes de Jesus Pires 5.430 (0,8%), Isabel da Costa Fereira 4.219 (0,6%), Felisberto Araújo Duarte 2.709 (0,4%).
Constâncio da Conçeicão Pinto ‘Terus’ 2.520 (0,4%), Rogério Tiago de Fátima Lobato 2.050 (0,3%), Virgílio da Silva Guterres ‘Lamukan’ 1.720 (0,3%), Antero Bendito da Silva 1.562 (0,2%) no Maria Ângela Freitas da Silva 711 (0,1%).
Ho nune’e totál votu válidu iha territóriu tomak ba kadidatura 16 ne’e hamutuk 651,859.
Tribunál Rekursu halo análiza ba dokumentasaun ne’ebé CNE haruka, valida rezultadu, fó-sai rezultadu no númeru eleitór sira ne’ebé rejista ona, votante, votu branku no votu nulu no votu sira ne’ebé atribui ba kandidatu ida-idak.
Hafoin, Tribunál Rekursu halo públikasaun iha Jornál Repúblika tuir akórdaun Tribunál Rekursu nian.
Notísia Relevante: CNE finaliza elaborasaun akta rezultadu apuramentu nasionál
Jornalista : Natalino Costa
Editór : Florencio Miranda Ximenes
