DILI, 01 Juñu 2026 (TATOLI)—Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten ekipa MSSI kontinua prosesa no verifika lista benefisiáriu ba Programa Bolsa da Mãe Condicional iha territóriu.
“Atu informa ita katak iha fulan hirak liubá ita halo lansamentu ona ba programa referidu, ne’ebé ita sei halo pagamentu ba iha tempu badak. Tanba ita seidauk hatene naran benefisiáriu sira-ne’ebé tama iha sistema ne’e ita seidauk halo identifikasaun ho kle’an maibé hosi parte dadus imprime fali ona hodi entrega fali bá munisípiu hodi halo re-verfiikasaun no kontinua ajusta fali sira-ne’ebé halo reklamasaun. Entaun, daudaun ne’e sei iha munisípiu hodi prosesa no espera katak sei halo pagamentu iha Juñu ne’e,” nia dehan ba TATOLI iha nia kna’ar fatin, Kaikoli, Dili, Segunda ne’e.
Nia dehan kona-ba reklamasaun ne’e tanba uluk naran sai maibé agora naran la sai entaun presiza verifika hafoin halo pagamentu.
Kona-ba totál benefisiáriu, nia dehan, tutór estimasaun ne’e bele sa’e to’o rihun 40 no benefisiáriu bele to’o 76.000-resin. Tanba ne’e, nia alokasaun orsamentu ba tinan-ne’e millaun $7.5.
“Estimasaun ne’e akontese tanba tinan-ne’e ita inklui mós benefisiáriu sira-nia oan hahú tama pre-eskolár,” nia dehan.
Florêncio tenik estudante ne’ebé frekuente iha ensinu báziku primeiru no segundu siklu sei hetan $8, ensinu báziku terseiru siklu hetan $9 no ensinu sekundáriu hetan $10, maibé kuandu estudante ho kondisaun defisiénsia mak sei aumenta $5.
Enkuantu, benefisiáriu Programa Bolsa da Mãe kondisionál tinan 2025 hamutuk 74.645, mane iha 13.973 no feto iha 60.672 ho nia orsamentu $5.935.734.
Nune’e, Munisípiu Aileu ho tutór hamutuk 2.902 ho nia benefisiáriu hamutuk 5861 no alokasaun orsamentu hamutuk $437.256, Ainaru tutór iha 2.723, benefisiáriu 5857 ho nia orsamentu $475,638.00, Ataúru tutór iha 606, benefisiáriu hamutuk 1.047 ho nia orsamentu hamutuk $83.118.00, Baukau tutór iha 2.839, benefisiáriu 5.950 ho nia orsamentu hamutuk $510.240.00.
Bobonaru tutór iha 3603, benefisiáriu 7.011 ho nia orsamentu hamutuk $552.174.00, Kovalima tutór iha 3.639, benefisiáriu iha 6695 ho nia hamutuk $532.334, Dili tutór iha 3.511, benefisiáriu iha 6442 ho nia orsamentu hamutuk $441.654, Ermera tutór iha 2.515, benefisiáriu iha 5.355 ho nia orsamentu hamutuk $461.964.
Lautein tutór 2914, benfisiáriu iha 6.185 ho nia orsamentu hamutuk $492.882, Likisá tutór 2.467, benefisiáriu iha 4.730 ho nia orsamentu hamutuk $377.388, Manatutu tutór iha 2.431, benefisiáriu iha 4.833 ho nia orsamentu hamutuk $399.282, Manufahi tutór 1.781, benefisiáriu iha 3.567 ho nia orsamentu hamutuk $321,888, Oekusi tutór iha 3.922, benefisiáriu iha 7.149 ho nia orsamentu hamutuk $542.940 no Vikeke tutór iha 1.982, benefisiáriu iha 3.963 ho nia orsamentu hamutuk $306.966.
Programa Bolsa da Mãe kondisional nu’udár kontinuasaun programa Governu nian ne’ebé hahú husi 2008 bazeia ba Dekretu-Lei númeru 18/2012, 4 Abril. Dekretu lei ida-ne’e hetan alterasaun iha fulan-Janeiru 2024 ba Dekretu-Lei númeru 1/2024, 3 Janeiru, hodi halo mudansa ba montante orsamentu ba estudante benefisiáriu sira tuir Dekretu-Lei anteriór iha artigu 10 no artigu 11.
Jornalista: Osória Marques
Editór: Xisto Freitas da Piedade
