DILI, 28 marsu 2022 (TATOLI) – Prezidente Institutu Nasionál Seguransa Sosiál (INSS), Longuinhos Armando Leite, hateten pagamentu idozu no invalidéz iha faze dahuluk hahú ho $50.
“Iha primeira faze ba tinan ne’e ita hahú ona ho pagamentu $50 tanba orsamentu foin daudaun ne’e ita aprova ona no sa’e ba $50”, Leite hateten ba Agência TATOLI, iha nia knaar fatin Caicoli, Dili, segunda ne’e.
Longuinhos rekorda katak iha 09 dezembru 2021, deputadu sira iha Parlamentu Nasionál aprova proposta númeru 147 hodi aumenta ba $50 kada fulan kompara ho antes $30.
Relembra katak aditamentu hosi artigu 20, subsídiu apoiu idozu no invalidéz kria hosi dekretu lei 19/2008, 19 juñu, iha tinan 2022 montante $50 kada fulan.
“Tanba ne’e mak iha tinan 2022 ita ezekuta de’it ona pagamentu $50 ba ita-nia idozu sira tanba tinan-tinan ita aprova orsamentu foun hela de’it entaun lei ezekusaun mós muda nune’e ha’u hanoin la presiza halo altersaun lei $30 ba $50 ne’e, éseptu iha dalan klaran mak derepente hasa’e osan mak labele no ita presiza duni halo alterasaun mak foin bele halo pagaamentu ne’e“,katak.
Nia friza idozu no invalidéz hamutuk ema na’in 93.378 maka simu subsídiu Governu nian iha faze daruak durante 2021 ho totál orsamentu $ 17.172.040.
Husi benefisiáriu 93.378 rejistu husi Aileu ema hamutuk na’in 3.307, Ainaro 5.138, Baucau 14.446 , Bobonaro 9.224, Covalima 6.129, Dili 9.366 , Ermera 8.013, Lautém 5.788, Liquiça 6.456, Manatuto 4.448, Manufahi 5.745, RAEOA 6.452 no Munisípiu Viqueque 8.886.
Jornalista: Osória Marques
Editór : Zezito Silva
