DILI, 28 marsu 2022 (TATOLI)–Governu liuhosi Ministériu Administrasaun Estatál (MAE) enkoraja sidadaun hotu atu partisipa másima iha Eleisaun Prezidensiál tinan 2022 ba segunda volta, nune’e bele hasa’e taxa partisipasaun eleitorál.
“Ha’u hanoin kondisaun ita kria ona, maibé mós presiza kolaborasaun eleitór sira hodi bele hakat ba sentru votasaun sira iha loron eleisaun, hodi hasa’e taxa partisipasaun tanba eleisaun sira ne’e ita hili reprezentante, hanesan hili ema ida atu sai Prezidente Repúblika, tanba ne’e hanesan Governu ami enkoraja populasaun sira hakat ba sentru votasaun sira atu vota,” Ministru Administrasaun Estatál, Miguel Pereira de Carvalho, hateten hafoin hasoru Xefe Governu, iha rezidénsia Primeiru-Ministru (PM), Taur Matan Ruak, Farol, segunda ne’e.
Notísia relevante: Taxa partisipasaun eleisaun prezidensiál 2022 sa’e to’o 77,26%
Tuir Ministru, Governu halo ona posibilidade hotu atu ema bele hakat ba sentru votasaun, tanba ne’e maka aumenta sentru votasaun no estasaun votu sira, ne’ebé kompara ho eleisaun iha tinan 2018, sentru votasaun no estasaun votu aumenta 25%.
“Ida-ne’e ita hodi urna besik liu ba populasaun atu ezerse direitu ba vota, tanba ne’e dever síviku populasaun idaidak, enkuantu hanesan órgaun eleitorál sira hanesan Komisaun Nasionál Eleisaun (CNE, sigla portugés) sempre aviza ba eleitór sira ne’ebé rejista ona, bele hakat ba sentru votasaun sira hodi vota,” nia akresenta.
Tanba ne’e, Ministru Miguel Pereira hamutuk ho Xefe Governu ko’alia oituan kona-ba preparasaun ba Eleisaun Prezidensiál segunda volta.
“Ami mós halo avaliasaun oituan kona-ba realizasaun primeira volta, liliu relasiona ho taxa partisipasaun ita-nia eleitór sira, ne’ebé iha tinan ne’e maski sa’e kompara ho Eleisaun Prezidensiál 2017, maibé nota katak sa’e de’it hosi 71% ba 77%, ne’ebé ema lubun ida mak seidauk vota nafatin, maski Governu halo esforsu nafatin atubele garante ema barak liután partisipa,” nia dehan.
Esforsu sira ne’ebé Governu halo maka aumenta sentru votasaun no estasaun votu iha territóriu tomak, nune’e mós kriasaun sentru estasaun paralelu iha Dili.
“Entaun iha segunda volta ne’e, Primeiru-Ministru husu órgaun eleitorál sira, liliu Sekretariadu Tékniku Administrasaun Eleitorál (STAE) hanesan órgaun ne’ebé hala’o funsaun hodi ezekuta aktu eleitorál ne’e bele hala’o funsaun ho di’ak liután iha forma ne’ebé atu aviza populasaun sira bele ba vota, nune’e bele hasa’e taxa partisipasaun eleitór sira iha Eleisaun Prezidensiál segunda volta, maibé sei hein lai desizaun hosi Tribunál Rekursu,” nia subliña.
Notísia relevante: CNE finaliza elaborasaun akta rezultadu apuramentu nasionál
Iha Orsamentu Jerál Estadu (OJE) 2022 prevee ba realizasaun Eleisaun Prezidensiál hamutuk millaun $9.
“Orsamentu millaun $9 ne’e fó ba STAE, ne’ebé Ministériu Finansa transfere ona, metade uza ona ba eleisaun primeira volta no metade sei uza ba segunda volta,” Ministru tenik.
Taxa partisipasaun iha eleisaun 2017 ho eleitór 743.150 (71,16%) no iha tinan 2022 ho eleitór 647.172 (77,26%).
Jornalista : Antónia Gusmão
Editora : Julia Chatarina
