Governu inagura sentru komunitária aprendizajen iha Bobonaro

BOBONARO, 28 marsu 2022 (TATOLI) – Ministériu Ensinu Superiór, Siénsia no Kultura (MSSK) no Monistériu Edukasaun, Juiventude no Desportu (MEJD), segunda ne’e inagura sentru  komunitária aprendizajen kuda ulun munisípiu Bobonaro.

Orsamentu ba implementasaun projetu ne’e  finansia hosi governu Koreia  liuhosi UNESCO iha Timor-Leste ho montante $20.000.00. Projetu refere implementa la liu hosi prosesu aprovizionamentu maibé entrega direitamente ba sentru komunitária no komunidade mak halo jestaun rasik ba orsamentu ne’e to’o obra remata.

Ministru Ensinu Superiór, Siénsia no Kultura, Longuinhos dos Santos, esplika governu koreianu tulun Timor-Leste estabelese sentru komunitária ne’e atu fó formasaun no kapasitasaun ba komunidade ne’ebé konsideradu Analfebetu  hodi hakbiit  sira koñesimentu nune’e bele kompete iha merkadu traballu iha nível lokál.

“Tanba ne’e governu iha obrigasaun ida atu promove polítika atubele garante no asegura programa analfebetizasaun hodi dezenvolve literasia ba ensinu ne’ebé maka espesiál no inkluzivu, tanba ita hotu hatene katak edukasaun importante tebes, edukasaun maka tranforma ema nia hanoin no muda ema-nia vida tomak, nune’e komunidade hotu iha direitu  hola parte iha edukasaun,” nia ko’alia iha suku Holsa, postu administrativu Maliana.

Ezekutivu ne’e hateten, sentru komunitária ne’e atu fasilita kursu  gratuita ba língua ingles, korea no komputadór tanba ne’e husu ba Maliana tomak atu aproveita didi’ak fasilidade hirak-ne’e tanba fatin ne’e atu fó oportunidade ba ema hotu hetan edukasaun.

Sekretáriu Autoridade Munisípiu Bobonaro, João Fátima do Carmo, agradese ba governu ne’ebé durante ne’e halo kooperasaun ho governu Koreia hodi esatbelese sentru formasaun komunitária ne’e.

“Inisiativa ida-ne’e di’ak tebes tanba bele fó tempu ba ita-nia oan sira hetan ensinu ne’ebé maka aas-liu. Sentru sira-ne’e bele promove ona sira-nia koñesimentu ho formasaun lubuk ida-ne’ebé maka prepara hosi ita-nia sentru sira-ne’e rasik,” nia agradese.

Uma ne’e ho nia luan 20×8 iha sala tolu kompostu hosi sala apredizajen rua, kada sala akumula estudante hamutuk 40 no sala manorin nian ida kompletu ho fasilidade sira hanesan kadeira, meza, komputadór tolu no printer rua.

Jornalista   : Sérgio da Cruz

Editór         : Evaristo Soares Martins