VIQUEQUE, 28 marsu 2022 (TATOLI)–Xefe suku Uaimori, postu administrativu Viqueque villa, munisípiu Viqueque, Francelino A. Gomes, hateten, kondisaun estrada ne’ebé liga bá suku Uaimori a’at, tanba ne’e difikulta distribuisaun materiál konstrusaun edifísiu eskola Pre-eskolár Sebastião Gomes.
Konstrusaun infraestrutura eskola ne’e tama iha projetu komunitáriu hosi Ministériu Edukasaun Juventude no Desportu (MEJD).
“Ha’u sente triste tebes haree kondisaun estrada liga bá suku Uaimori ho kondisaun agora. Susar tebes atu lori materiál konstrusaun edifísiu eskola Sebastião Gomes no sai difikuldade tanba kareta lori materiál labele asesu,” Xefe suku informa ba Agência TATOLI, iha salaun administrasaun munisipál, segunda ne’e.
Notísia relevante: Grupu komunitáriu hahú konstrusaun eskola lima iha Viqueque semana oin
Daudaun ne’e, grupu komunitáriu ne’ebé envolve iha konstrusaun ne’e hamutuk ho profesór sira halo konstrusaun halo ona limpeza fatin ne’ebé atu konstrui eskola.
Ba kestaun estrada, Xefe suku Uaimori husu ba autoridade munisipál atu inklui Ministériu Obra Públika (MOP) hodi tau-atensaun normaliza dalan.
“Povu presiza dalan di’ak hodi bele transporta sasán no materiál ruma hanesan halo edifísiu eskola Sebestião Gomes. Nune’e mós, difikulta komunidade labele lori sira-nia produtu lokál asesu ba merkadu.
Orsamentu ba konstrusaun Pre-eskolár Sebastião Gomes iha suku Uaimori ho totál orsamentu hamutuk $89.396,09, ho durasaun implementasaun projetu ba fulan-neen.
Jornalista : Vitorino Lopes da Costa
Editora : Julia Chatarina
